張惠雅為HotCha捱到腎炎 讀中醫搵後路：以前博到好盡！
08年，因為腰痛，Regen.C(張惠雅)好奇心驅使下問Google大神，認為自己是腎痛症狀，公司同事不以為然，結果忍痛捱足一整天，入院後證實為腎炎。
曾經以為組成HotCha是自己的全部，結果卻是名不成利更不就，同組隊員不相往來，Regen話：「點解要做組合？ 一係搵到錢，一係大家都好夾，現在兩樣都唔係……」
Hotcha可說是八九十後的集體回憶，三個妹妹仔青春活潑，可惜到2014年宣布拆夥。Regen坦言，自15歲簽約，直至07年組成HotCha初入樂壇，一度令她以為「HotCha」是自己所有。「我覺得好誇張，HotCha頭幾年真的沒有放過假，去旅行都只是新年價錢最貴那三四日，因為唔會有人叫你返工，請假都要一齊請，公司唔想缺少左任何一個。」
「我以前搏得好盡，腎炎都要忍痛捱足全日，完成工作才入院。」她形容自己若果不暈低都會繼續工作，同事們總覺得年紀輕輕不會有腎炎，於是沒有積極處理。「可能我天生好奇，腰痛正常人都只會覺得是疲勞引起，但我就懷疑有腎炎，當時已經對人體好奇。」唔講唔知，Regen現在除了學中醫外，閒暇時更有研究茶道，既然她的合約快將完結，要轉行都不會是難事。
她承認：「仲諗緊(續約)，如果現在可以寫埋書講旅遊就好了，現在讀緊中醫，有考慮過會唔會Full time讀書。」
出道時被呼為「雞」
雖然Hotcha已經解散一段時間，不過談起Regen，總會讓人想起Hotcha，或許是這隊組合太深入民心。她坦言：「現在才知道好多人鍾意Hotcha，以前網絡世界冇咁好，少啲渠道知道自己有人喜歡。」回顧當年一點一滴，她笑言：「我好記得一出道時，有人話我們係雞。」不過努力經營，總能令人將這錯誤印象消去。
雖然幕前她們姊妹情深，共同拼搏，但原來她們從來都不是閨蜜。Regen直言從前與Winkie(黎美言)行街食飯較多，不過她們三人都甚少私下接觸，「連傾電話都唔會」。故此解散至今，除了在公司或公共場合碰面外，都罕有接觸。
談起解散，Regen仍然覺得是正確決定。「我好理性分析，點解要做組合？ 一係搵到錢，一係大家都好夾，兩樣都唔係，我唔想因為搵少少錢而走得這麼唔舒服，現在大家各自行反而好好。」她補充道：「我們三個性格好唔同，音樂理念又唔同，好似拍拖感情咁，雖然好努力維繫，但真係唔適合走埋一齊。」
「其實我一直都覺得，背住HotCha個名係一種壓力，唔想將呢樣野背負著走落去。」言下之意，HotCha不會重組？「這個幾肯定不會了，可能想想讀唔讀書更好吧！」
「點解要做組合？ 一係搵到錢，一係大家都好夾，兩樣都唔係，我唔想因為搵少少錢而走得這麼唔舒服，現在大家各自行反而好好。」
出走為抗抑鬱
Regen 在2011暫別樂壇出走到澳洲，雖然有傳言她成為第三者而被下令放逐，但她坦言出走原因是工作壓力太大，甚至嚴重得出現幻覺。「這個決定對我來說好大，因為我用言語都表達不到我有幾重視這份工作，我由小五開始玩比賽，因為熱愛日本組合《SPEED》，從小就對住電視不停模仿和參加比賽，玩到成個東涌都識我。」要選擇放下從小的夢想出走，相信當時的壓力大得難以承受。
雖然澳洲渡過一年半便回港發展，她承認本來計劃繼續出走，只是有朋友要結婚才意外地提早回來。「澳洲返來本身想做Blogger，但公司叫我返來唱歌。」
既然重視工作，又何以要放棄一切重頭來過？「其實有同自己講過，走左要重頭再來，但唔會覺得可惜，因為得到的是屬於HotCha。」言談間，總覺得她把HotCha和她分得很開，可是她決定回歸這個令她有抑鬱的樂壇，原來是因為夢想這東西。「我覺得自己勇氣極大，我願意相信多一次，當我再回來時，對呢行睇法好唔同，我想趁有氣有力，還能講夢想的歲數，拼搏埋佢！」
「我小五開始玩比賽，因為熱愛日本組合《SPEED》，從小就對住電視不停模仿和參加比賽，玩到成個東涌都識我。」
服裝：AMERICAN EAGLE OUTFITTERS
場地：Mini home
攝影：梁碧玲