王菀之(Ivana)為今次個唱成功減磅,雖然她有意繼續瘦,但一講到慶功宴美食,似乎很快破戒。(葉志明攝) 為紀念入行20周年,王菀之(Ivana)相隔11年再登紅館,一連兩場《合體 – 王菀之演唱會2025》昨晚(23日)舉行尾場,王菀之一出場即叫全場觀眾起身一齊唱,整晚大部分時間以歌會友,直到「皇上」同「皇后」合體,二人由首晚面對面,改為背對背,培養情緒時,王菀之已忍不住落淚。唱完之後,王菀之上前從後抱抱軒公,其後軒公亦為王菀之整理儀容,一對「靈魂伴侶」無需任何語言而默契十足。演唱會結束後,觀眾成功「嗌」出王菀之,加碼唱《把戲》、《永遠幾遠》。
完騷後,王菀之接受訪問時表示門票火速售罄給予了自己及團隊很大力量,本身亦想加場,但由於搭台、拆台等問題,所以未能成事。「有諗過日場,但唔知啲人肯唔肯,又驚我把聲未必唱到日夜,但都好完滿,可能有part 2呢。」問到大家會否再等11年,王菀之坦言不想等太久,但亦有當中的原因。「都唔係咁易申請,今次都申請咗好多次,佢又要逐個月搞,啲手續我又唔識。」
講到與「靈魂伴侶」張敬軒一部分,王菀之笑言抱抱對方時,感覺是「佢瘦我好多」,很擔心對方在後台喊暈。她又解釋為今次演出零綵排,事前與軒公不見面、不溝通,到場後亦「避見」,直到升上台一刻,才將最真摯的情感釋放。「過去20年大家為夢想努力,生活中好多困難要克服,但都會互相支持。我對佢、樂迷好有信心,大家都知我哋做緊咩。」