曾樂彤成本年度新人獎大熱　推出處女EP瞓身影封套

年尾樂壇頒獎禮進入倒數階段，歌手們都爭相努力作最後衝刺，今年焦點女新人之一曾樂彤，由Youtuber變身做歌手，呢日推出首張個人EP《#meme》，原來碟名亦係網絡用語，有網絡爆紅事物嘅意思。除咗說明曾樂彤打從一開始Youtuber身分引起關注外，仲有另一種含義，曾樂彤：「碟名拆開讀就由兩個 “me”組成，暗喻我唔止得一個面向，可能之前我做YouTuber到宜家做幕前俾人感覺有落差，咁究竟邊一個先係我呢？其實無答案，可能兩個都係呢！至於封套輯相，就玩同一個造型用兩種截然不同的感覺呈現，有跳脫，有嚴肅，又有無厘頭，但無論咩風格都係我。」

拍攝唱片封套時大部姿勢都需要瞓地，曾樂彤笑言連汗都唔留多滴，怕水腫所以連水都唔敢飲，但辛苦係有回報：「我自問對影相係有要求，今次輯相淨睇螢幕已經滿意到可以直接出，唔駛修圖超厲害！」除咗典型chok樣外，攝影師仲特意捕捉曾樂彤未入狀態前呆滯或大笑look，加埋插畫之後，古怪的配搭竟然零違和，完全切合佢認真地搞笑的本質。而當攝影師叫曾樂彤擺出自然的姿勢，無論著裙定著褲佢都毫無顧忌地擘腳，又或者單手做掌上壓，份外投入確實娛樂到一班工作人員，大讚佢除左識影靚相，仲有本事駕馭「騎呢造型」，呢種喜感、百變同無包袱，將會係佢做娛樂圈一項強大本錢。

曾樂彤又謂即使初入行都知唱片業不景氣，對於公司還會出資為自己出碟，心存感恩:「聽都聽得多實體碟市場不斷萎縮，但做一張唱片要投放嘅資源同心機真係好多，好多謝公司，作為人生其中一項履歷，我覺得好幸運。」咁問到會唔會對銷量感壓力，佢補充到因為一張碟除了當作商品，亦算是2018年小總結，本身已經有紀念價值，對比起銷量，反而更著重外界對專輯封套同第四首新歌《我我》的反應，始終下左唔少苦功。問出碟後有任何大計，佢立即笑到：「今年公司向我身上投資唔少，希望之後幫公司賺翻多啲呀！」