今年最強潛力新人黃妍　出道後繼續Busking走勻十八區

Sony旗下唱作女新人黃妍(Cath)今年正式出道，先後推出《如何從夏天活過來》及《笑容迷路了》兩首歌，唱作實力得到不少網民認同。臨近頒獎禮前夕，Cath更落足力宣傳，由昨日(11月23日)開始一連三個星期的五、六、日，將走勻十八區Busking。

其實在黃妍正式出道前，她已是Busking的常客：「我以前一路都有Busking，要一個人拖住啲器材去霸位，因為得一個人，所以通常去啲容易啲霸位、但人流少啲嘅地方唱，而我其實一路都好想喺香港唔同地方Busking，作為一個香港人，好想走勻18區去Busking，一直都想挑戰呢件事，但一個人冇辦法拖住啲器材去咁遠，同公司講起呢個諗法，估唔到公司又真係陪我癲，哈哈！今次真係可以走勻18區，陪我唱勻全港，我心情非常興奮！」她更指可以藉今次機會回味當年Busking那種很辛苦，但又會很滿足的感覺。

昨日Cath先後到天星碼頭及旺角兆萬中心對出演出，她憶說：「最初Busking時係喺旺角，同啲朋友一齊『柴娃娃』去旺角花園街上面嗰條天橋度唱。」雖然Busking期間有保安人員上前查問，但經驗十足的Cath未被嚇怕，輕鬆應付，除了唱出自己的作品外，更大唱《稻香》、《甜甜的》、《香格里拉》、《我願意》等作品。而今日(11月24日) 及明日，她更會去到長洲、中環碼頭、銅鑼灣、石硤尾、深水埗、葵涌及荃灣等地Busking。