【麥浚龍．專訪】拉闊音樂會後首談唱功 Juno：我懷著狠心摧毀它
Juno麥浚龍回歸樂壇簽約謝安琪後，首次合作演出的音樂會便是剛於11月頭舉行的拉闊音樂會。正當Juno阿Kay唱到《弱水三千》時，台下突然一陣哄動，有人覺得期待，也有人認為跟CD版本落差較大。的確，麥浚龍被稱為Studio歌手（只能做碟的歌手)）已有一段時間，客觀從音樂角度來說，這算是一種讚美，起碼大家也認同唱片水準高。但同時部份樂迷亦會感到落差，例如經常會有人說：「點解Juno啲歌咁好聽，但現場往往都係強差人意？」以下，是麥浚龍在拉闊後，對音樂追求的一份自白。
攝影：梁碧玲
第一章：我揀歌唔會為咗易唱！
訪問當日，記得Juno保持一貫從容的態度，大概對他來說，公眾對藝術的批判早已是習以為常，還記得當年出道初期他在台上被喝倒彩，也沒人料到今天大家對他的認知已全然不同。不過筆者作為採訪者還是不敢太造次，先是東拉西扯一輪，感覺大家也進入狀態時，再冷不防問他一句：「有人覺得麥浚龍唱Live唔好聽，但大家又好期待可以現場聽到一啲高難度嘅歌，你有冇介意過？」
他絲毫沒對這評價感到驚奇，意識到這個問題跟拉闊當晚扯上關係，亦知道當晚樂迷對選曲的意見：「首先對我作品有期望嘅樂迷，不論係睇現場定聽唱片，我都好感謝佢哋，亦唔介意大家對我有任何意見，我唔會嬲，返到屋企我會諗，我想再做好啲。每個一演出，都會有當中嘅缺憾同沙石，但唔會阻止我喺創作世界上繼續挑戰。挑戰嘅意思唔係我下次揀容易唱或者適合唱現場嘅歌，例如喺拉闊入面，我哋選曲其實係一個章節、一個旅程，我哋嘅關注點係在於點樣表達呢個故事。作為歌者，我哋好自然會用歌手嘅方法去演繹歌曲，但後來我哋發現，董折、浦銘心兩位主角係唔應該咁有節奏感。」或許就像Juno與莫文蔚合唱的《瑕疵》中所言，這一個個的「小錯處」總令人又愛又恨，視乎你的觀點與角度，用音樂還是故事去看待這份演出。
在訪問之後一日，Juno透過WhatsApp，向記者傳了一段關於今次對談的感受：「對我的聲音，我沒有如其他歌手般追求如何去保養它。相反我懷着一份狠心，是如何去摧毀它。 / 我到了今天依舊對自己的聲音感到陌生，也許我怕太熟悉，就沒有出發探索的空間。」
P.S. 全文刊載於這篇訪問的結尾。
第二章：一切改變由《雌雄同體》開始 只收女仔Melody
被稱為Studio歌手，大概是由2005年的《雌雄同體》開始。當時Juno剛離開環球唱片，帶了好幾首作品過檔Silly Thing，其中一首是《雌雄同體》。他憶述起當年的情況：「嗰一年係我最長頭髮嘅年代，錄《Proto》（2004）呢張唱片，我一整年就戴住頂帽，困自己喺錄音室，沉醉於過程當中。但當時有好多聲音叫我唔好唱《雌雄同體》，最簡單嘅一個理由就係呢首係一首女仔demo，我經常會諗，唱歌係咪一定要咁樣呢？然後我唔理所有人，我同王雙駿講我一定要唱《雌雄同體》，一把聲高八度一把聲低八度，一定要做，然後就出現咗呢種帶中性味道嘅歌。」
就是由一首歌開始，改變了Juno往後的音樂生涯，他開始傾向收女聲demo，及後出現了《弱水三千》、《超生培慾》、《瑕疵》等作品，為樂壇提供了多一種選擇。談及自己的創作，感覺總是充滿叛逆及批判，他憶述：「去到再之後嘅唱片，仍然會出現呢種界線嘅作品，甚至只係度身訂造女聲demo，例如馮穎琪每次畀我嘅demo都係女仔歌。但從音樂人身上得知，其實每個作曲人寫歌仍然會收到唱片公司設立畀佢哋嘅界線，例如寫歌畀男仔就要點點點。我會疑問，咩叫男仔melody？咩叫女仔melody？點為之不可能？點解唔可以撈亂唱？於是乎我就開始只收女仔melody。」
第三章：我寧願古天樂唔好唱得太順
透過Juno的作品，我們可以感受到種種的奇蹟，除了樂迷對他的聲線又愛又恨外，今年他亦創造出另一個「不可能」，便是古天樂隔15年後再次推出音樂作品《(一個男人) 一個女人和浴室》。眾所周知，古天樂並不特別喜歡唱歌，甚至今次出新歌，他也特意向Juno提出一個條件：「唔好要我唱Live。」在如此苛刻的條件下，古天樂仍然是Juno的不二之選，大家或許疑問：「古天樂真係最適合嘅人選？」
對此，Juno亦為古天樂錄音的過程作解說：「我覺得首先要講嘅係，其實喺錄音室裡面，古仔嘅表情、語氣係非常豐富。反而係我監製呢首歌嘅時候，要求佢以藍定凌嘅角色去唱。因為今次每一個角色喺創作嘅時候已經有劇本，而我作為監製要求嘅，並唔係將佢變成一個煥然一新、好唱得嘅歌手，反而我寧願佢唔好唱得太順，因為呢首歌唔容易唱，佢唔係琅琅上口、副歌重複嘅旋律。所以我要求佢透過呢首歌，去飾演藍定凌呢個角色，佢係一個財經報導員，鍾意陪住老婆唱歌嘅一個人。呢個係跳出咗歌手唱歌嘅思考模式，因為兩個歌手走埋一齊合唱，好自然會將佢哋嘅聲線同技巧混和一齊，但我正正想要嘅係佢哋之間嘅反差，所以錄音嘅時候，我會禁止佢好多語氣同聲線。」
歌曲面世當天，全世界嘩然：「嘩古天樂復出！古仔唱歌！」對麥浚龍來說，這類聲音卻不是他所期許：「我同佢研究呢個角色嘅時候，經常都會講，我唔希望佢係一個噱頭，佢絕對係一個新登場角色，對故事嘅章節產生影響。我唔係要兩個歌手嘅名字放埋一齊，然後大家覺得好驚訝。因為新專輯《The Album》係關於一個人生嘅故事，每個角色會遇到唔同嘅人、唔同嘅處境。我諗呢種做法樂壇比較少有，而我正正認為樂壇需要呢種創作，我想擦甩大家對流行曲嘅界線。」
後記：他的短訊 ── 沒摧毀決心，那來重建力量？
P.S. 今次的對談並未完結，並將會更深入去探討麥浚龍出道12年間，在音樂事業上一些重要的轉變，之後會再有文章刊載是次對談。
但在訪問過後的另一天，記者收到Juno的短訊。對於今次對談，他用一個晚上去寫下了以下的感受：
「我不信蒼天，無鬼神，亦沒神佛。
我只相信一顆善意的心。永遠這樣出發，就這麼簡單。
這個世界沒有完人。
人，總帶著多多少少，大大小小的沙石。
對我的聲音，我沒有如其他歌手般追求如何去保養它。相反我懷著一份狠心，是如何去摧毀它。因為我追求的，早已不止是如何去唱一首歌。人生每一個經歷，都是沙石。經歷要透過聲音呈現出來，我選擇了不平坦的方式來說故事。因為這更難能可貴。
一呼一吸。也許我愛上了千萬個瑕疵與沙石。
而人，就是集結由千萬個瑕疵與沙石而成的。
在我的創作理念上，我相信，如沒催（摧）毀的決心，那來重建的力量。
可能就這樣的關係，我對自己創作上的要求，很苛刻，很狠心。
不狠心，就不算創作。
千算萬算，怎也及不上單純的率性。
對大多數人來說，現場演出能夠如專輯一樣就叫達標。
我時常會認為如果這樣的話，那留在家𥚃聽專輯便足夠。
每一次公開演出，我在乎的是記下當下的氣氛，天氣，室溫，等等的轉變，怎樣影響著我的狀態和情緒。而沙石，也許正正是說故事當中我所選擇的一份真實感。亦是赤裸地帶出那份無力感。柔弱的角，冥冥中也許這是這個意思。
當然，我非常感激大家一直以來對我的包容，甚至愛惜我的種種沙石，及對說故事的那份渴求和那份扭曲怪力的思考模式。
我到了今天依舊對自己的聲音感到陌生，也許我怕太熟悉，就沒有出發探索的空間。
從來，我最執着/希望的就是每一位與我並肩合作的單位每次也能夠一起發亮。這才叫合作。
我沒能力改變樂壇現處於的大境況，但我所能夠兼顧的是，聚集志同道合的音樂人，我的專輯，就是一個樂壇。
仍能對創作抱著一份緊張和心跳冒汗。
細想一下，是多麼幸福的事情。」
Juno