【農夫‧專訪】人生苦多過甘？　C君：大家生活到而家已經好犀利

十八年，對大部份音樂人尤其是組合來說，這個年數已算是長壽，香港曾有不少組合因種種原因而拆夥再重組，也有不少歌手淡然離場。組合能做到十八歲，的確是運氣和人氣的加持。正好今年農夫踏入他們的十八週年，為了慶祝「生日」，11月將再次於麥花臣舉行《十八歲生日快樂演唱會》。
一路走來，農夫由道出人生哲理的音樂作品，再到人見人愛的主持工作，他們總是帶著笑容，但到底在歡樂的背後，農夫又是經歷過如何的心境，才能寫出影響一代人的作品？
攝影：葉志明
Hair：Renton Hung@La Chioma
Makeup：Manyee Lau

作品特別多愁善感？　陸永：生活咁困難大家都過到，其實好犀利

每次示人也是嘻皮笑臉，自從農夫出現在電視螢幕上，歡樂仿似變成了他們的代名詞。但早在他們成為電視節目主持前，農夫不少音樂作品也帶著點點的苦澀味，《粒粒皆辛苦》、《我的志願》、《重新找到你》，戳中不少星斗市民的心聲。用歌曲講述各階層的人生，大概你會發現作為歌手的農夫和在電視上的農夫相距甚遠，到底他們是如何看待「人生」？難道就如歌詞所述，「做咗幾十年人好似苦多過甘」？

陸永首先答道：「其實有好多歌都唔係想講人生好辛苦，做人好慘。我哋最想講，每人都經歷咁多事情，好似捱得好辛苦，但到而家仍然可以生存得咁好，其實每一個人都好犀利。」C君續答：「可能大家覺得我哋有好多作品都係多愁善感，其實最尾每首歌都係想傳達同一個訊息，你能夠生活到今時今日已經好勁。因為大家每一日嘅生活都真係好多難題、好多現實考慮，或者心情上嘅問題，但仍然渡過到喎。」

貧窮反而唔難捱　C君：因為當時大家都對我哋冇期望

就如字面所寫，農夫，總是辛勤的代表，正當大家每日重重覆覆起身、工作、下班、吃飯、睡覺，仿似把生活畫下了時刻表，不要以為他們作為藝人便過得比大家輕鬆。近日為宣傳演唱會，其實他們也一樣同一個鐘數又上班，8點便起身開始宣傳做訪問，回想起自己貧窮的年代，好像還過得輕鬆一點，C君笑說：「貧窮嘅年代係無乜壓力，因為嗰時無咩做，大家又唔會對你有期望，而家諗返起當時如果有多少少錢，其實都幾逍遙。當然而家大家嘅期望，會變成既是壓力又是動力。例如我哋今年開騷，有人提議我哋做上年嗰個騷嘅Part 2，但我哋接受唔到。我哋唔識得改少少又攞返出嚟做，要做咪度一個全新嘅騷，因為我哋覺得大家而家有期望。」

不過提起農夫最有壓力的時期，陸永便數到樂壇最為蓬勃那段時間：「嗰時做任何嘢都要有Plan，因為大家都係咁做，一年要有幾多首歌、出幾多隻碟。但你知我哋兩個做嘢方式都唔係咁，變相就成為一種壓力。」

早期作品被嘲似兒歌？　C君：我哋唔想令人覺得農夫係壞人

農夫曾經有不少作品題材也會涉獵到和兒童有關的題材，就如《學海無涯》、《問題兒童》等，深信有不少樂迷也聽過，農夫的歌被喻為兒歌。對此他們毫不介意直認：「我哋真係攞過兒歌獎㗎！幾榮幸呀！直頭有傳媒幫我哋確立咗呢個形象！」C君笑言：「對上一次大家聽到有兒歌Rap嘅，好可能已經係家燕媽媽同紫昕姐姐。」陸永又接道：「其實好早期我哋都有啲睇法，係Hip Hop一定要咁樣咁樣，Rap又要點。而當時我哋已經覺得自己好嘻哈㗎啦，黑人音樂我哋一定比你聽多上千倍，你哋咁都話我兒歌，咁不如你教我做嘻哈啦。但到咗而家我哋就梗係唔會再咁樣鑽牛角尖，就係個兒歌獎令我哋衝破呢種諗法。」

其實真正令他們衝破這個關口，是童年時家長對Hip Hop的誤解。C君解釋：「而家大家未必感受到，細個聽Rap，如果阿爸阿媽知道咗，係會覺得你曳、爛仔，甚至再早期啲，連夾Band都畀人覺得係壞人。到我哋玩Rap嘅年代，就好多人會話：嘩呢啲人好反叛㗎。所以我哋當時就有少少想法，到底有冇可能做一啲喺屋企都聽得嘅Rap，連你阿媽聽咗都唔會鬧你。因為我哋有接觸呢種音樂就會知道，佢唔係壞人嘅音樂，有啲歌都好有意思。當然去到呢個年代已經冇咗呢個問題，因為佢已經變成世界上一種主流音樂。」