講足6年終於同DUO band合作出碟 陳奕迅：有一首係盧凱彤作曲
Eason陳奕迅早前奪得第29屆台灣金曲獎的「最佳國語男歌手獎」，今年正式重新活躍於香港樂壇，先後推出兩首廣東新歌《漸漸》、《可一可再》，並宣傳將於年底推出專輯《L.O.V.E》，專輯以「Eason and the duo band」的名義推出，而the duo band便是舉行《DUO陳奕迅世界巡迴演唱會》時，與Eason合作的一眾音樂人，包括恭碩良、盧凱彤、王雙駿、陳詠謙、蘇德華、岑寧兒等人。
今日Eason舉行記者發佈會，談及希望與the duo band合作推出專輯，其實已是2012年的想法，今年11月左右終於能推出，連主持謝茜嘉聽到也禁不著笑說：「我好似聽過你講呢句好多次，我諗好多朋友都聽過。每次你做起一隻碟，就會話你同duo band都有隻碟準備要推出。」Eason只好表示：「我每次都忍唔住喺做緊隻碟嘅時候，就要話畀大家知。我好叻做promotion㗎，呢隻碟嘅promotion我做咗六年。」
接受《香港01》訪問時，Eason表示今次專輯《L.O.V.E》當中，the duo band成員之一的盧凱彤生前也有參與歌曲創作。她與孫偉明合寫了一曲，Eason形容為「有好多嘢聽」，而且現在先把「最Pop」先推出，大碟中還有很多fusion感覺的歌曲。
席間問到Eason到底何時再開演唱會，他先是躊躇一下，不知道該不該透露，最後還是忍不著跟大家說：「如果再開show，都會同今次隻碟有關係。因為我哋剪輯緊一套紀錄片，好似一個回憶咁，然後我諗諗下，又覺得係咪應該將the duo band再聚埋一齊開個show呢？不過唔係巡演，只會喺香港做一場，唔賣飛。因為如果我想喺細場淨係做一場的話，賣飛好難搞。」
為了這個音樂會，Eason腦中閃過千百個念頭，有想過只做網上直播，但基於質素關係，又好像做現場會較理想：「始終我好耐冇喺香港開騷，所以好想帶啲鼓勵畀香港嘅弱勢社群。但同時都好擔心到時好多人都話自己係弱勢社群，所以要時間去構思。但我不打算公開售票。」
被問到對黃牛黨的看法，Eason表示自己並不怕黃牛黨：「因為我都唔會幫襯佢哋，不過最好唔好有啦，現時風氣好似好難處理。有時我去銀行同啲經理傾開計，佢哋都話無辦法唯有買黃牛。我有諗過點樣先係最好嘅售票方法呢？係咪一定要網上賣呢？我都唔知，但我聽聞過五月天嘅樂迷係好好，話唔買就唔買，最後啲黃牛都要減價賣返出去。不過我自己都理唔到呢個問題。」