陳家樂原來係劉華粉絲！　靚聲還原《暗裡著迷》MV

早前陳家樂(Carlos)憑劇集《逆緣》當中飾演鍾定國，彈起成為新一代男神。原來入行近十五年的他，可謂「周身刀張張利」，高大帥氣、演技精湛不在話下，2003年憑英皇新秀歌唱大賽打入16強而入行的他，唱歌也有一手。有著這樣的先天優勢，絕對是扮演任何角色也能勝任。近日在電影《兄弟班》中扮演年輕版彭健新，不知是否cosplay上癮，襯著劉華宣布年尾開紅館騷，Carlos再作大膽嘗試，cosplay自己的兒時偶像劉德華，翻唱兼重演《暗裡著迷》的MV。

先睇一睇原版MV，勾起大家對呢首歌嘅印象

為著今次《暗裡著迷》MV的經典還原，Carlos可說是落足心機，由造型、舉手投足以至MV的分鏡、場景，也完全跟足原版MV。陳家樂表示：「依首歌，我細細個已經識唱；依個MV，我已經睇過無數咁多次，每一次睇我都幻想自己就係華仔，瀟灑咁喺銅鑼灣撥頭髮...... 」故此決定向偶像致敬，將《暗裡著迷》MV 經典還原。Carlos更開玩笑向粉絲提問：「如果我咁樣cosplay去睇偶像演唱會，大家話有冇得諗。」

陳家樂呢個致敬版MV真係似到十足十，我諗劉華如果開拍傳記式電影，年輕版搵陳家樂飾演就啱晒！

為咗呢個MV，家樂事前嘅準備功夫真係一絲不苟，除咗入錄音室重新錄製歌曲，髮型方面，試都試咗好多次，「MV入面其中一個亮點係撥頭髮，我會喺屋企對住塊鏡練習撥頭髮。」至於化妝方面，由於華仔輪廓比較深，所以化妝時家樂會特別加深鼻骨同顴骨陰影，「放飯時間，妝都冇落，就咁除咗個假髮就去食飯，食食吓，隔離枱誤認咗我係劉德華，勁開心，哈哈。」除此之外，家樂話最難忘係MV尾段淋花灑部份，「我哋係拍咗呢part先，因為預咗唔會一take過ok，所以團隊都準備咗幾套衫俾我替換，但我自己唔記得預備底褲，所以拍完淋花灑後，同事就要漏夜跑去便利店幫我買底褲，然後先可以落街拍，真係辛苦晒。」

睇埋幕後花絮嘅相，真係越睇越有劉華味