【華星孖寶】與楊千嬅合作開騷　杜德偉：私下成日交流湊仔經

楊千嬅同陳奕迅、梁漢文曾被稱為「華星三寶」，2011年曾經孖住開過一場音樂會，當時一票難求相當經典。嚟到2018年千嬅又再孖華星人開騷，今次就同早佢十屆參賽，1985年新秀冠軍杜德偉crossover 開演唱會。雖然以前也有在一些節目上合唱過，但一同舉行演唱會就是一個新嘗試，日前更為演唱會拍攝海報，Alex分別以斯文同狂野rock 造型來「迎戰」千嬅一身桃紅長裙，連Alex都話期待演出的火花！

千嬅同Alex相識多年，原來私下都好friend不時有互動，Alex話：「我們之間除了談及舊時，講下以前合作的事，亦會講下屋企、湊仔經都係我們常談的話題。」今次演唱會不設公開賣飛，Alex笑言希望可以長做長有：「在計劃今次演唱會內容的過程中，其實我們也覺得好精彩，想同更多觀眾朋友分享，所以之後我好希望會有更多合作，甚至可以衝出香港同更多歌迷見面。其實以前曾有一齊合唱過廣東歌，今次更會有國語歌、快歌、慢歌，會互唱對方的歌，而跳舞當然走唔甩！不過都要等綵排階段時，排舞老師如何安排。講到尾，最重要是台下觀眾看得開心！」