【專訪】將本土文化Rap到內地都明　Heyo：從細節滲透廣東話特色

本地Rapper Heyo上月舉行《老表大奔走》新碟巡演，是沉寂一年半後的「重生」之作。Heyo向來以「玩字」見稱，無論押韻、內容、意景都引人深思，可謂玩盡廣東話。今次《老表大奔走》Heyo卻嘗試rap普通話，有人可能會問「是否進軍內地就要『跪低』』？」
可Heyo堅定地回答：「我冇舔呀！我知道自己做緊乜就得啦！我係想透過細節，滲透廣東話特色俾佢哋聽嘛！」
攝影：黃國立

我哋唔會差過《中國有嘻哈》㗎！

聽着《老表大奔走》，感覺就像跟Heyo、Vyan飛雲南半個月走一轉，大家聽得過癮，但原來這趟旅程「Chur到爆」。Heyo形容，造碟過程猶如參與綜藝節目：「好似參加咗遊戲節目，你去半個月同我造隻碟出嚟啦！得半個月去執啲素材，聲音、畫面、圖像，再去Vyan廣州studio錄音。造完歌要即刻拍埋MV，又搵一班民族樂手錄完音再拍MV。」

他續說：「參加《中國有嘻哈》可能要你一日寫好16個Bar，而我哋係要寫好再拍埋！你哋做到呢個Level，我哋唔會衰過佢哋㗎嘛！」

Rap普通話等於「跪低」？　Heyo：「我冇舔呀！」

Heyo一向予人印象堅持粵語，玩字玩到盡，精雕細琢歌詞內容。今次合輯《老表大奔走》rap普通話，也算是挑自己的初體驗。不過，他會否怕這個嘗試惹來被指「跪低」的負評？

Heyo堅定說：「我冇舔呀！你咪試下返大陸一句國語都唔講，支持你！」他續說：「我梗係要透過啲細微嘅嘢，滲透廣州、廣東話特色俾佢哋聽啦！我用普通話，想透過呢隻碟用「懷柔」政策，俾多啲13億人都聽到，同佢哋講『其實你都聽得明』㗎。」

「你知啦，『打的』、『的士』呢啲字都係耳濡目染就成功咗，所以我係深信呢個竅門。」

關於語言的問題，Heyo舉王家衛的電影為例回答：「你唔可以話，王家衛套戲入面啲角色講上海話，跟住唔睇；可能你真係冇睇，我吹你唔脹嘅！同埋呢次旅行我知道自己做緊乜就得啦！」

「有啲諗法你唔相信自己，你要等全世界認可你先行，咁你就行後咗㗎喇，咁你就自己取捨啦！」

造歌並非單純情感發洩　發洩下一步要點行先？

喜歡Hip Hop的讀者大概都知道，大部份歌詞題材主要圍繞黑幫、藥物、性、個人情感，因為這確實是部份Rapper的生活寫照，這是Hip Hop的根源之一。隨時日發展，Hip Hop的題材也有所改變，Heyo說：「我唔係好鍾意啲一味喺度抒發嘅歌，講完一輪粗口，發洩完，咁下一步呢？可唔可以係自己經歷咗啲嘢，提供啲hints俾人，而唔係淨係情感發洩呢？你冇答案咁成班人做乜X啫？」

除此之外，Heyo表示自己回不去「嘩眾取寵」的時候，他以往也寫過《VSOP》、《喜愛射毛》、《睇醫生》這類「排洪式發洩」或是「吊吊揈」的歌曲；或許「嘩眾取寵」仍是這個時代的「主流」，但Heyo寧願用當時學習所得的經驗，放到其他範疇，發掘更多新題材。

想本土文化有價值　就要將文化產物推廣出去

上文提到Heyo不想再固步自封，決定找方法行出去，對於如何保存、發揚本土文化，他有自己一套。

Heyo說：「Hip Hop係好global音樂，你見好多公司意識到，所以我哋依家係時候要走出去。部份年輕一輩試過一啲方法，唔走出去，但到某一個臨界點，你就要開放行前一步。如果想將香港文化做好啲，我哋要推己及人。你想令到一個語言、文化變得有價值，就要做好多文化產物，去豐富自身文化，大家要喺各自崗位努力，再擴散出去。」