許冠傑譚詠麟再合體玩轉紅館　識做冧fans：你哋熱情到我頂唔蒲！

許冠傑與譚詠麟兩大歌神再度合體，今晚於紅館舉行《阿Sam & 阿Tam Happy Together Part 2》演唱會頭場。兩位歌神兌現承諾開Part 2，歌迷當然落力支持，現場座無虛席，燈牌、打氣棒出齊，未開騷先興奮。

許冠傑與譚校長打頭陣唱出《冷傲的化妝》、《Look For Star》、《心思思》，兩人身穿銀色bling bling戰衣出場，聯同一班cyber打扮的Dancer又唱又跳，校長更跳幾下機械舞，相當鬼馬。到chit chat環節，校長話：「阿Sam上次同你開騷恨咗40年，今次等咗4季（即一年）就得喇！」又大讚阿Sam keep得fit：「阿Sam同上年好唔同，上年佢越做越fit，今年未做都fit！而我就繼續keep fat，哈哈！」

兩位歌神一向錫歌迷，剛開騷已經幾次走到觀眾席與歌迷握手，全場冧到又尖叫又伸盡雙手，為求搏得一「握」。阿Sam又為《歌迷》（原曲：《Feeling》）一曲譜上新詞，繼續鬼馬風格：「譚&冠為求生計又再開咪」、「谷到盡唱到爆肺 但願你會Like」校長抵死話：「多謝在座各位流動提款機！」隨後話：「依家鄭重提醒你哋，你哋嘅表現影響我哋會唔會Encore，你哋記得大聲啲跟住唱！」

互動完一輪，歌神與校長合唱《夜半輕私語》、《天邊一隻雁》、《跟你做個Friend》，又借《告別樑上燕》（原曲《Love Me Tender》）向貓王表心聲：「而我已是古來稀，偶像仍是你！」觀眾反應熱烈，阿Sam大讚：「大家熱情到我都頂唔蒲呀！」