墮台拉傷頸部肌肉仍堅持演出 古巨基：今晚如常紅館見！
古巨基一連五場的《WE我們世界巡迴演唱會香港站特別版》昨夜進行第二場時，發生了嚇倒全場的不幸事故。基仔開場不久便意外墮台，不過專業精神爆燈的他，休息十五分鐘後便立刻回到舞台上努力完成整晚演唱會。雖然期間感覺到他有點勉強，頸部更是腫起一塊，基仔也不時摸著後頸位置，不過一直等到演唱會結束後才趕往醫院檢查。
基仔完騷後由紅館趕往養和醫院檢查，並拍片放上fb向歌迷及關心他的朋友報平安：「我剛剛照了磁力共振，因為今晚跌落地個位係頸背下面，所以要照清楚，結果係骨冇事，所以大家可以放心，目前只係肌肉拉親。絕對不影響明日演出，所以大家放心，不用擔心我，照舊如常紅館見。」
事發當時，基仔唱出第一首歌《爆了》後，便失去重心跌落台中的升降台機關中，不止觀眾被嚇呆，連在場的圈中好友，包括祖兒及阿Sa也匆忙趕往後台看看發生什麼事。當時基仔倒卧於台底地上，工作人員移開將要降下的道具飛機後，等聖若翰救傷隊人員為基仔檢查。救傷人員為他檢查過四肢都沒大礙後，基仔便慢慢站起來打算回到台上演出，完全沒理會傷勢。期間有人提議中止演出，馬上到醫院詳細檢查傷勢，不過基仔不停輕聲重複: 「我覺得我可以繼續唱。我想繼續唱。」
在台上消失了十五分鐘，基仔終於再次緩緩升上台，期間不時手摸後腦，並向觀眾表示：「冇問題，係我錯，係我唔知道唔記得咗時光機個位，冇問題，多謝你哋願意係到等番我上來，我好想繼續落去 ，我盡力繼續落去，冇事，大家不用緊張，不用擔心，冇事，上天會保祐我，冇事。我行到係咪？我會用最大努力演出，回報大家。暫時講咁多先，唱《必殺技》！」他亦在台上向到場睇騷的父母報平安：「阿爸阿媽我冇事，不用擔心。係背脊落地，唔係個頭，大家唔好擔心！不過一陣如果換衫位耐啲 ，跳舞硬啲！大家體諒下。」
而昨夜為基仔擔任嘉賓的周慧敏，上台後更立刻擁抱基仔：「我的確係嚇親！不過我依家見到你，我好開心！感謝神，我會同你祈禱。」Vivian獨唱時也特別小心，恐防再有意外發生：「我唔會郁㗎啦！咦，點解唔見左個交叉(mark位貼紙) 㗎？」在演出過後，Vivian表示，基仔發生意外五分鐘後，工作人員才敢通知她當時狀況，生怕影響她的演出情緒：「「我知道佢發生意外之後，驚到都唔識畀反應，但係我都冇辨法入去睇發生咩事，只係衝出來後台口，望住個電視，等到佢升番上台唱歌嗰刻先安心。大家都預咗我可能上到台會喊，但係我同自己講真係唔好喊，我一喊就影響晒我哋表演嗰兩首歌，而且基仔咁正能量繼續企喺台上唱歌，我都應該好堅強咁出台，帶畀大家開心平安嘅感覺。佢發生咁大件事，可以完成晒個騷，我好佩服佢毅力。」
完騷後，一班好友也在後台等基仔，阿Sa直言事發時嚇到胃痛：「頭先最恐佈，係發生意外之後，全場靜止咗咁，冇人出聲。我同祖兒過咗一陣覺得有啲唔對路，於是就返入後台，睇下有咩要幫手，好彩上天係一定眷顧好人，希望接住落嚟幾場平平安安，基仔加油。」而祖兒亦表示：「今日第一次見到意外發生，基仔突然消失，台上又熄燈，成場冇聲，我嚇到真係擘大個口得個窿。之後我入後台睇睇有咩可以幫手。我覺得古巨基好勁，咁跌法，但係佢堅持到自己意志力、毅力，面對愛戴佢嘅觀眾朋友，佢一定要完成個騷，我好佩服你呀古巨基。」