【專訪】趙學而笑看翻唱王稱號：可能大家覺得我嘅翻唱歌好聽啲

樂壇中，總有一些歌手是不常露面，也不常推歌，但每次看見他/她的演出也讓人驚艷，坊間也讚不絕口。這類「隱世歌手」在香港並不如想像中罕見，就如即將於4月尾開紅館演唱會的趙學而，大家對她的主要印象或許也是停留在《皆大歡喜》的林玉露一角當中，不過參加新秀歌唱比賽入行的她，由原創歌到翻唱時期，憑著實力終於能一步一步的走上紅館舞台。
攝影：黃國立

早幾年趙學而密密做碟，不少翻唱作品為人津津樂道，更有年輕一輩以為《最佳位置》及《偏偏喜歡你》是屬於她的個人作品。直至近年，她終於專注開騷，繼2016年在九展的個人音樂會，今次初嘗紅館舞台，趙學而認為一切也是Right On Time：「由2008年開始自己投資做高質素錄音，當時已經有開演唱會嘅打算，亦有主辨方想搵我開紅館。不過當時覺得自己人氣未夠，加上我想自己主理，考慮到製作費問題，結果一直擱置。但當時出咗發燒碟之後，喺內地多咗登台機會，近年不停來回香港同內地，每年都有人問我想唔想開騷。直至2016年我哋喺九展小試牛刀，發現反應超越我哋想像，所以完咗九展個音樂會後，就落實入紙紅館。」

除了林玉露，趙學而近年更多了一個新花名叫「翻唱王」，她笑言：「其實我都唔知點解自己會有個翻唱王嘅稱號，應該係網絡上嚟，我諗啲人覺得我唱人哋嘅歌好聽過自己嘅歌啦。可能我用自己方式去演繹其他歌嘅故事，會令人更容易有感覺。今次演唱會都唔例外，我都揀咗一啲其他人嘅歌去唱，應該會係比較歷史遙遠一啲嘅歌，未至於係老歌，不過一定陪伴咗好多人成長，70、80後都會認識嘅。」她更坦言要堅持選唱廣東歌：「當年廣東歌喺華南地區絕對係首屈一指，我覺得呢一段咁開心嘅時光係要攞出嚟同大家重溫一次，因為紅館係相當適合呢種氣氛。」

回望過去，趙學而走過的每個階段，在她心目中均是精彩，每段也值得回味：「唔係太多人可以好似趙學而咁，喺娛樂圈當中接觸到咁多個範疇嘅工作，而且經過咁長時間都仲可以企喺度做緊嘢，仲可以同觀眾keep到一個緊密嘅關係，所以我好興幸喺唔同階段都有唔同嘅收獲。」由出道講起，趙學而初入行主持《婦女新姿》、《娛樂新聞眼》，她道：「呢啲節目令我可以成功打到入屋企，所以其實我佔咗大家屋企好大嘅位置。我就好似同你一齊長大嘅表姐咁。」及後轉戰唱片公司，以歌手身份跟大家再次見面，又是另一面的趙學而：「好好彩當時公司幫我揀選咗一個比較中性嘅形象行出嚟，當時周街都係玉女，大家會覺得趙學而都幾大膽，講嘢又硬梆梆，又男仔頭。好容易會令你記得，其實趙學而就係隔離屋嘅奀皮仔。」經營幾年後，不論是《每隔兩秒》當中對愛情有憧憬的小女孩，還有《越怕越愛》、《尋人》等慢慢成熟的形象，直至《尋開心》的出現，大大改變了趙學而的事業：「當時九十年代中尾，係一個歌舞昇平的年代，大家有飯就食、有舞就跳，竟然有一個女歌手咁坦白唱一首對於愛情、對於兩性有關的歌曲，歌詞的赤裸程度，令大家覺得有人為佢哋發聲。」其實趙學而的歌曲也在跟大家一起成長。