Katy Perry想學廣東話選錯內地歌迷 打圓場：唔好畀語言變成枷鎖
美國流行天后Katy Perry昨晚首度來港舉行《Witness The Tour》巡迴個唱，既然一場嚟到，當然想入鄉隨俗學幾句廣東話，不過Katy先後兩次點名都點中中國內地粉絲，不單廣東話學不成，仲鬧出不少笑話。
第一次問係唱完首本名曲《Teenage Dream》，Katy話自己「Mandarin」（普通話）唔好，叫觀眾醒她幾句，但現場隨即起哄話應該教廣東話，對中文一竅不通的Katy當然唔曉分辨，她問被挑選中的觀眾「凍」跟「熱」的廣東話，對方教她講「Re」（普通話拼音），全場又再起哄，結果Katy覺得有啲嘥氣，求其學完就唱出歌曲《Hot N Cold》。
到接近尾段，Katy都係唔甘心點都要學返幾句廣東話，今次仲邀請觀眾上台，但話口未完就有一位黑衣男子衝上台與Katy抱抱，Katy雖然照單全收，但似乎有少少被嚇窒並說：「原本我應該踢佢落台……但我都愛佢嘅！」之後Katy揀中一位看台上靠近欄杆、戴上藍色假髮兼著裙的男歌迷，仲猛摧對方趕快上台，這位男歌迷就急急腳由看台爬落地面再擒上舞台，激動得口震又流淚。
【多圖】Katy Perry首襲港開騷出盡法寶 側手翻倒豎蔥劈腿樣樣齊
這位大隻粉絲原來來自湖南，自稱叫「Katy Plus」（加大碼Katy），Katy問他的服裝在哪裡買，他毫不猶豫說是淘寶貨，Katy聽不懂，台下粉絲補充一句「阿里巴巴」，Katy就明白了。然後Katy問粉絲會不會說廣東話，他回答只會說湖南話，之後Katy就叫全場觀眾教她講「我愛你」的廣東話，仲叫該粉絲一齊學。
兩次都抽唔中香港歌迷，Katy就打圓場話：「今日於現場嘅我哋都係一夥，一個國家有好多方言，唔好畀語言變成我哋嘅枷鎖」，之後仲話有一個字係世界通用：「Selfie」，隨即用手機同粉絲自拍，仲同對方講：「我等咗你一世」，而粉絲就感觸地話現場有好多內地歌迷，但同時亦有好多內地歌迷未能欣賞今次個唱，希望Katy可以到內地開騷，Katy見粉絲扁晒嘴，就用普通話講「我愛你」，仲承諾好快會到中國開演唱會。之後Katy亦提到所有人都可以分享音樂，沒有事情可以分化及分開我們，隨即唱出歌曲《Conditionally》，有粉絲大受感動，一路聽一路喊。