【歌手2018】重量級Jessie J參賽 其實場波未打都知賽果係點
撰文：彭嘉彬
出版：更新：
湖南衛視音樂節目《歌手2018》將於明晚首播，自《我是歌手》開始，雖然節目曾更名為現時的《歌手》，不過大大話話都已經做到第六季，節目陣容可以話越玩越癲，季季都有位外藉歌手參賽。上一季已經出現咗一位哈薩克國寶級歌手迪馬希，當時在中華地區仍是寂寂無名的他，在參賽過後搖身一變為廣告商的新寵兒。今季更誇張，連英國女唱作歌手Jessie J也被請來《歌手2018》，唔通又要同成班歌手鬥飆高音？
睇慣《歌手》系列，其實大概都會知場波會點發展。中國乃係泱泱大國、禮儀之邦，Jessie J作為首發歌手，節目組抱住有朋自遠方來嘅心態，點都會比佢贏返幾輪先嘅，可惜事不過三，通常去到第三第四集左右，佢嘅成績就會滑落，徘徊於三甲邊緣，最後屈居亞軍或季軍。
你話我口講無憑？其實都有迹可循。《我是歌手》第四季，韓國歌手黃致列頭四集都穩佔三甲位置，其後開始過山車式滑落再上升，第六、第四，再升返上第一，經歷幾輪之後，最後只能屈居季軍。上年《歌手2017》，迪瑪希以黑馬姿態率先跑出，連奪兩次第一名後，本來觀眾一致睇好迪瑪希，不過第三集開始滑落到第三名，及後更跌至第六名，然後再經歷幾集的過山車式上落，最後也只得第二名。如果這些外藉歌手每集的名次串連成股票走勢圖，重疊在一起時其實也頗為相似。所以Jessie J今次落場，其實場波未踢都已經估到賽果。
說實的，其實一個國際知名的女歌手又何需靠成績來定成敗？起碼一首《Price Tag》已是無人不知，未聽過呢個人，都會識唱呢首歌。不過今季《歌手2018》的參賽歌手名單本來已不令人期待，她的存在的確會讓節目的質素及吸引力大增，再者連《中國有嘻哈》的冠軍阿Gai也是參賽者之一，實在令人期待他會否與Jessie J在台上合唱成名作《Price Tag》。