邊個話出家人唔可以夾Band？ 日本和尚開音樂會唱佛經超受歡迎
最近網上討論區出現一則有趣的發文，有巴打表示搭地鐵時看見坐在對面的僧人在閱讀Hi-Fi雜誌，並拍下照片作證。不少網友對此深表好奇之餘，亦有人大驚小怪，到底和尚為何會看Hi-Fi雜誌？難道播佛經也要講究、聽大悲咒都要靚聲？雖然討論區也是吹水為主，最後並沒什麼結論，不過又不得不提，其實除了基督教，佛教同樣是跟音樂相當有關連的宗教。平常佛教儀式中所念的經文，也是音樂一種，所以便會配以木魚、法螺等樂器演奏。來到近代，這些被稱為「梵唄」的音樂，更會被灌錄成唱片，甚至結合流行音樂元素，作為音樂治療。
日本近日便有一位佛系歌手在網上爆紅，僧侶薬師寺寛邦在2003年便開始組成樂隊「キッサコ」(Kissaquo) ，並自己作曲作詞推出唱片。結合搖滾、流行元素，薬師寺寛邦曾推出不少「玄味」甚濃，卻又勁易入口的歌曲。去年舉行音樂會，公開演唱了一首《般若心經》，片段隨即在網上瘋傳，連帶主音薬師寺寛邦也成為熱搜對象。其實這位僧侶一啲都唔老套，除咗會唱佛教音樂之外，亦不時會喺網上翻唱流行曲，例如上年紅到爆嘅日劇《逃恥》主題曲《恋》又有唱過，中島美雪嘅《糸》又有唱過，一支結他，一把聲，治癒唔少心靈。即使開Live，佢同佢嘅樂隊「Kissaquo」成員都係以acoustic改編歌曲為主，事關原來薬師寺寛邦好鍾意聽Michael Buble嘅歌，而另一成員山元サトシ則是創作歌手山崎將義的忠實粉絲，難怪連風格也如此接近。
你又點會諗到，連經文都可以改編到咁治癒？
呢位和尚閒時都會翻唱一下大熱流行曲。
自家創作嘅歌曲一樣都好高質
講開又講，其實日本喺推廣佛系音樂方面的確係做得比其他地方成功。除咗啱啱介紹嘅「キッサコ」之外，你以為《般若心經》淨係得佢哋唱過？少年你太年輕了，其實日本國民級虛擬偶像初音未來亦曾翻唱過，不過當然是由人工合成聲音，而初音未來的版本中加上更多的電音元素，令歌曲層次更豐富、未來感更重。除了初音以外，一名日本的佛寺住持更在去年2月舉辦過一場電音法會，把電子音樂及光影技術結合到宗教儀式上，這位住持更表示：「希望讓年輕人知道搞宗教其實也可以很酷。」
連初音未來都唱過《般若心經），係咪好Mind Blowing呢？