【自選Playlist】聖誕禁歌要小心 唔好亂聽《Last Christmas》
又到咗一年一度，天下間所有派對動物最期待，單身一族最想逃避的聖誕節。迎接平安夜嘅同時，深信唔少朋友都會被逼喺街上聽到好多同聖誕有關嘅歌曲，即使唔出街，留喺屋企上網亦一樣會見到臉書上嘅朋友無間斷地分享聖誕歌。不過記得留意，唔係首首歌都好似《Jingle Bell》咁開心，亦有好多你未必有聽開嘅歌曲，原來同《Lonely Christmas》一樣有置人於死地嘅魔力。所以早啲做好準備，大家就可以平平安安、相安無事咁過返一個平安夜，無謂大時大節再特地為自己添上一層寂寞氣氛。其實呢三日都唔係咁難捱啫。
《零度聖誕》 - RubberBand
RubberBand嘅《零度聖誕》，基本上同《Lonely Christmas》有異曲同工之妙。歌詞描述熱鬧的派對中，主角呆坐一旁，看著好友踫杯起舞，心儀的女生與他人談笑甚歡，偏偏只有自己聽足全晚情歌，也未能鼓起勇氣接近心儀對象，更慘的是，這個畫面已經重復多年，而主角每年也只好默默跟自己說：「明年還有機會！」歌曲配以acoustic音樂作開首，令寂寥感更強。戴著耳機的你，齋聽歌都已經有晒畫面，令處於人海中的你秒秒鐘也像是慢鏡播放一樣。
《曲奇聖誕歌》 - Cookies
唔好以為慢歌先係聖誕禁歌，其實對某啲朋友嚟講，快歌一樣可以係大殺傷力武器。Cookies初出道時期的作品《曲奇聖誕歌》，表面上是一首輕快歡樂嘅歌，連MV都係Cookies一齊開開心心開Party，不過原來歌詞暗藏殺機。「又到聖誕 誰又在慨歎 又到聖誕 更加之怕冷 獨身人最悶的夜晚」，一大班人開Party熱熱鬧鬧，突然唱句咁嘅歌詞，獨身人又再被插一刀，真係收幾多禮物都補唔返！
《今年沒聖誕》 - 許志安
講到聖誕慘情歌，除咗陳奕迅嘅《Lonely Chrsitmas》之外，許志安嘅《今年沒聖誕》都係一首代表作。深信好多情侶喺年頭已經約定對方聖誕要去邊去邊，點過點過，甚至連禮物都一早準備好。可惜當中唔少人年尾都未等到，就已經變回朋友身份，又或者朋友都做唔成。一早Plan好嘅聖誕節目唯有搵另一個實現，禮物也只好轉贈他人。最慘係被遺下一方，只能望住自己準備好嘅禮物暗暗概嘆。如果你嘅情況都差唔多，呢首歌真係避得就避，因為實在係太應景。
《又到聖誕》 - 吳浩康
呢首《又到聖誕》並唔係《Santa Claus is coming to town》嘅中文版。吳浩康嘅《又到聖誕》再次係單身狗悲歌，聖誕冇街去，唯有安慰自己：「其實有工開都幾好呀！」，歌曲重點不停強調「我冇事，我冇事！其實唔過聖誕可以煩少幾樣嘢，點解一定要咁大陣象呢？三餸一湯又過一日啦！」可能每個人心中也曾經試過這樣「洗自己腦」，卻更顯心中空虛。越扮冇事其實越證明有事，如果有朋友經常哼出這首歌，記得關心一下他。
《Last Christmas》 – Tonick
《Last Christmas》絕對係聖誕真經典，由外國組合Wham！主唱1984年的原曲，不但被多位歌手翻唱，甚至成為了各大商場聖誕節的熱播歌曲。播到出街又聽到，返屋企又聽到，唔講真係以為呢首係聖詩。不過當個個都當呢首歌係聖誕神曲，開開心心咁聽嘅同時，又有幾多人真正留意過歌詞內容。第一句「Last Christmas I gave you my heart But the very next day you gave it away. 」中文大意是指「上年聖誕節，我將我嘅真心交畀你，不過第二日你就將佢拋棄」。一首稱得上元祖級聖誕慘歌的《Last Christmas》，實在不明為何會被大家當成應節歌曲去聽。
而樂隊Tonick一樣曾把《Last Christmas》改編，由朋友借錢唔還一事開始貫穿整個故事。原來好兄弟向自己借錢，就係為咗追女仔，隔年你仲發現佢結埋婚生埋仔，而呢個女仔仲係你心目中嘅女神，劇情比《雷雨》更慘情。好多人會安慰自己「聖誕冇情人，起碼都仲有朋友兄弟。」不過連兄弟朋友都掉低你嗰吓…算啦你都係聽住歌過聖誕啦！