《長相廝守》攞完獎係落力啲！　ToNick九展開騷全場跳到癲

樂隊ToNick今日在九展Star Hall舉行《不停站》演唱會，即使全場企位樂迷亦一樣投入又唱又跳，一齊「玩到跳掣」。今年ToNick勢頭強勁，《長相廝守》一曲大受歡迎，更先拔頭籌於十大中文金曲得獎；另外又入圍叱咤我最喜愛歌曲最後10強喜事連連，難怪ToNick四人在台上表現更落力。

雖然《長相廝守》爆紅，但ToNick照樣有玩早期作品《窮》、《雪糕糯米糍》、《講咩都錯》、《瀨嘢》、《What A Sunny Day》等等照顧樂迷需要。ToNick一向予人熱血「咩都夠膽死」的感覺，雖然演唱會到晚上8點50分才開始，比原定時間delay不少，但他們一出場便炒熱全場氣氛，主音恆仔大叫：「今晚唔好慳力同我哋玩盡佢呀！」樂迷當然交足反應邊跳邊高舉搖滾手勢，跳唔郁就跟住拍手，無論拍子幾快幾慢都跟到足，就連歌曲action位都冇甩，果然溫晒書先入場。
 

一出場玩完《3ree》、《雪糕糯米糍》、《瀨嘢》，恆仔本身打算介紹演唱會主題點知甩鞋帶，鼓手晨曦即刻出聲：「我諗住打救你哋，兄弟有難梗係要幫手！」聽到呢到，真係要講一句「係愛呀哈利！」唱到《窮》時，主音恆仔忍唔住插水，雖然佢叫樂迷送佢返上台，但樂迷一於少理，將恆仔送到觀眾席最尾。