【多圖】周國賢落力唱到聲沙　過百fans嗌Encore廿分鐘唔肯走

周國賢昨晚於旺角麥花臣場館舉行《銀河鉄道之夜》演唱會頭場，早前門票開買火速售罄，到開騷之日當然入座率爆滿，無論坐位企位都擠滿一心撐周爸的歌迷。而Zarahn的兄弟高佬在台上擔任結他手，現為飛機師的鼓手Jerry在台下支持，獨欠Bass手Joey就齊人。演唱會更邀得何韻詩任監製，絕對是一大驚喜。

演唱會主題為《銀河鉄道之夜》，顧名思義與宇宙、星空等等新紀元的元素有關，台上熒幕亦有播出相關動畫、生命之花、時鐘等等配合主題。

呢次演唱會台、燈、聲都一流，睇住相回味先！(江智騫攝)

周國賢非常照顧樂迷感受，除了舞台有天橋延伸至觀眾席中，讓與樂迷近距離接觸外；歌單包含各首新舊大作，如：《地下街》、《十四天》、《告一段落》、《不敵》、《陽光燦爛的日子》、《有時》、《天馬行空》及《在天之靈》等等都有，滿足不同時期開始聽周爸的樂迷。而在場樂迷都做足功課，尤其一響起《十四天》、《不敵》，全場自動波大合唱，場面溫馨。

昨晚舞台效果非常出色，到最後四首歌時，舞台架起一襲薄紗，投影機投射出在宇宙漫遊的片段，一時是第一身從太空艙眺望窗外銀河，一時是第三身觀看寫有「E」字的太空船在太空航行。周國賢則置身在太空中唱出《重逢》及《星塵》，配合如此震撼的畫面，定必令觀眾對歌曲有另一番體會。演唱會最後以一曲《在天之靈》劃上完滿的句號，雖然周爸唱到最尾一段忘記歌詞，但氣氛搭夠，樂迷一樣受落。

今次演唱會的舞台效果的確一絕！(江智騫攝)

演唱會於晚上11時20分完結，但樂迷群情洶湧，一直留在台前至11時30分也未散去，過百人留在場館，多次嗌Encore歡呼，要保安及工作人員多番勸籲至11時45分才陸續散去。

周國賢完騷接受訪時，被問是否太興奮傾盡全力，導致演唱會一半就開始聲沙，他表示：「因為開騷前瞓唔到覺，加上枕頭影響到條頸，所以要睇針灸。不過唔使擔心，以前夾band都係咁，瞓番一晚就冇事！」

今次邀得何韻詩作監製，之後兩場會否請對方上台合唱？周國賢笑言：「隨緣啦！我哋玩藝術都唔會排除任可能性。反而我想有次佢開騷，我可以企喺佢個位感受一下！」

另外問到，周國賢每次開騷或者網上post片出新歌反應都非常好，像有謎一般的魔力，對此周國賢謙虛話：「過獎過獎！其實我真係好感恩有好多好錫我嘅歌迷，可能真係時間長年累月有一班一齊長大嘅歌迷。我覺得全部歌都係自己寫、自己編，我會去觀察身邊嘅事物，包括歌迷嘅故事去寫歌，變相好似同大家一齊成長咁！好希望可以喺不久嘅將來，可以喺更大嘅場地同大家見面，避免咗之前好難買飛嘅情況，咁我就心滿意足。」