陳柏宇為紅館騷初次跳舞　舞台冇提字機最驚甩歌詞

陳柏宇將於今個星期六舉行首個個人紅館演唱會《陳柏宇Speechless演唱會2017》，最近密鑼緊鼓為演出綵排，原來租用了將軍澳電視城側的邵氏影城作綵排地點。甫踏進綵排室，一條一條白線貼在地上，原來是模擬出紅館四面台的平面圖。Jason表示：「因為一般綵排室沒有足夠空間，於是租用了這裡才能練舞。」原來Jason為了自己的首次紅館個唱，特地為新歌《勉強共勉之》排舞，初次將自己的舞姿在紅館舞台上展現。

不過說實的，一向歌路較為靜態的Jason，原來跳舞也有一手，接受訪問時，問到他為何不多出一些跳舞歌，他坦言：「其實我本身唔係特別喜好跳舞，只係去到唔抗拒嘅程度。好似今次同班Dancers一齊去練舞，件事係好玩嘅，但平時又唔會得閒跳兩步。」首次開四面台演唱會，陳柏宇沒有把壓力放到自己身上：「其實同三面台唔爭太遠，只係排練嘅時候要記多幾個走位，萬一唔記得咪跟住啲Daners走囉。」反而另一個演唱會給予Jason的壓力，竟是來自歌詞方面，因為一般四面台表演也會在台上設置提字機，以防歌手忘詞，不過Jason大爆今次的演唱會竟然沒有提字機：「呢個係其中一個壓力啦，個注意力要分散咗去記歌詞。因為平時彈結他，我可以望住啲歌詞，就記得自己要彈啲咩，但今次無歌詞又無樂譜，變相兩樣嘢都要記。不過總要搵啲機會比自己去挑戰吓突破吓。」

不過除了即將來臨的演唱會外，年尾也是歌手們的爭獎時刻。去年叱吒上，Jason奪得「叱咤樂壇男歌手 銀獎」，輸個馬鼻比坤哥，但其後網上呼聲卻極高，不少樂迷也認同Jason是時候摘下「男金」寶座。今年Jason好事連連，年中與太太符曉薇成婚，年尾又首次開紅館個唱，到底在他心目中，又是否期望能在今年底把「男金」放進自己的獎座櫃裡？他保持一貫的豁達：「真係無特別希望攞到。老套講獎項只係一個Bonus，其實做人冇得下下為咗回報而付出。反而對我嚟講，付出嘅過程我自己有得著，不論係學到新嘅嘢、有新嘅體會、幫到人，呢啲先係真正嘅回報。其實唱歌就係我嘅工作，自己喺今年嘅工作入面已經覺得好滿足。工作係生活一部份，起碼我好鐘意自己嘅工作就足夠。」