前As One成員Kayan撼贏台灣歌手 「跳」出香港反而成為人氣王！
新一代的香港跳唱組合，從來給人感覺跳得唔唱得、一味靠「騎呢」博出位，甚至會有人認為他們能夠成為歌手只不過因為他們學過跳舞。不過，最近就有一位由女子跳唱組合出身的歌手以她的唱功令大家改觀。她除了在今年情人節時上載了一條cover dance短片得超過160萬的點撃之外，她最近在台灣歌唱節目《希望之星》連贏兩星期，揚威台灣。她就是前As One成員Kayan（陳嘉茵）。
女子組合As One自隊長Shin單飛到韓國發展及成員Nata約滿相繼離隊而名傳實亡。其後Kayan及Chloe自此未有在樂壇有新發展。雖然在音樂事業上停滯不前，但年僅21歲成員Kayan卻永不言棄，她在今年2月情人節期間與天堂鳥成員Tyrese聯手拍攝周杰倫《告白氣球》cover dance影片，結果網上瘋傳。而最近她又在《希望之星》贏取連續兩星期的MVP。
Kayan在第四集《希望之星》以羅志祥的《精舞門》踢館，並贏得首個MVP。她在跳唱《精舞門》時，以一字馬作結尾，技驚四座贏盡全場尖叫聲。（點撃以下影片收看）
Kayan接受《香港01》電話訪問時謙稱：「其實我仲有好大嘅進步空間。我喺第四集（《希望之星》）係以踢館身份挑戰，用3日時間準備演出。點知最後出乎意料，成為全民投票嘅MVP。我當時真係開心到喊咗出嚟。」
Kayan除了在第四集成為MVP，到上星期的第五集中她以張惠妹的歌曲《Bad Boy》更蟬聯MVP。談到能夠連續兩周都拿得好成績，她表示：「可能我係香港女仔，佢哋（台灣人）覺得有新鮮感。加上呢個比賽少有唱歌加跳舞嘅參賽者，佢哋一般都係以抒情歌為主。好多謝佢哋肯投我一票。」
Kayan在第五集中以張惠妹的歌曲《Bad Boy》參賽並禪聯MVP。Kayan在這個節目中不再走以往的清純路線，反而以性感狂野舞步及唱功征服觀眾。（點撃以下影片收看第五集片段）
如果有留意她早前拍的cover dance影片留言，會發現有不少來自台灣的支持者。問到早前儲下的人氣是否成為在節目中禪聯MVP的關鍵，她回應：「其實條影片係有幫到我，可能因為用咗周杰倫嘅《告白氣球》，所以初初得到唔少台灣網民嘅關注，而且當時第一個報道係嚟自台灣傳媒，之後再有內地傳媒報道。而節目製作組都有睇過我嘅短片所以經Facebook inbox邀請我參加今次比賽。」
Kayan今次由拍cover dance MV得到大家對她跳舞的認同，再由比賽令到台灣觀眾肯定其唱功，問到有否覺得香港人「走寶」，她笑言：「緊係唔覺啦。我覺得唔同地方有唔同品味，文化。最緊要係做好自己，無論咩地方都好只要有人聽我唱歌我已經好開心。我好開心可以以唱跳歌手身份得到大家認同，我會繼續努力。」
Kayan續說：「好快大家會聽到我嘅新歌。我其實都有為自己作曲，雖然自己喺作曲方面係BB班級數，但係歌曲都係表達自己嘅想法，應該下一年會面世。」