【一首歌】周國賢《14天》Rock友情歌　「一不小心學會發生接吻」

周國賢年尾12月會喺旺角麥花臣場館開騷，即使加場都好，今日大批fans紛紛吐苦水話買唔到飛，有人認為內部認購hold住晒啲飛，有人就直斥黃牛黨炒飛阻住晒，睇嚟周國賢要化身好關公先可以平息民憤。

買到飛當然開心，買唔到飛嘅唯有重溫周國賢嘅歌頂住先，今次就講返周仔初出道時嘅作品《14天》。周國賢一向都係以Rock友形象示人，拎住結他力嘶力竭自彈自唱嘅畫面相信大家都好有印象，邊個話Rock友唔可以寫情歌呢？《14天》由周國賢負責晒曲、詞、編、監，曲風是比較粗糙直接的Pop Rock，歌詞講述puppy love的經歷，曲詞互相配合，一聽就好有畫面。點解？因為初戀一定係充滿激情，而且多數都唔完美，《14天》完全表達到呢種感覺，你聽完係咪都諗番起一啲往事呢？

雖然依家周仔都變成周爸，無論曲風定係主題都變得更成熟，有人會覺得更有男人味，歌曲更襟聽；不過，久唔久聽番《14天》、《不敵》、《極樂》等等作品搵番嗰後生仔嘅感覺，可以當係幫自己撳一次F5。