吳浩康演唱會記招感動落淚　經理人Mani：冇人可以放逐你

2017年年尾似乎是歌手開騷的好時機，除了紅館期爭崩頭之外，九展一樣有不少歌手開音樂會。在Facebook上開足幾個月直播節目《Deep Nite Show》的吳浩康，終於宣布將在12月10日在九展舉行《Listen to Deep Live 2017》演唱會，而門票則在10月4日正式公開發售。話雖如此，其實在早前的優先訂票中已售出大部份門票，剩餘的公開門票大家便要趁早入手了。在今日舉行的記招當中，Deep亦表示有機會加場，不過也要視乎公開發售的情況而定。

記者會上，吳浩康邀請了麥秋成到台上，原來阿成為Deep的演唱會排舞，更表示今次演唱會將會有驚喜，因為樂迷將會少有的看到Deep在舞台上跳舞，而Deep亦相當識做，即席示範苦練多時的舞步，的確有板有眼。而Deep亦即席演唱了新歌《較早前錄影》，他更表示很感激黃偉文為他寫的詞，當中不多不少也把他的經歷和感覺寫了出來。似乎今次的演唱會，Deep的確落足力練習，將渾身解數也施展出來。

而記招上的重點，是吳浩康的經理人Mani霍汶希也有上台支持。Mani在台上表示：「由阿Deep新秀入行簽佢返嚟，到而家經歷咗十幾年，其實真係要用高低起跌去形容。喺我做經理人嘅生涯當中，阿Deep係令我好深刻。」而阿Deep在旁笑說：「我諗最肉酸嗰張相，都係我帶挈你嘅其中一張。」Mani續道：「其實每個人都會有做錯過，不過我深信，無人能夠放逐你，只係你自己放逐自己。因為只要你料到，你自己努力，你行出嘅一條路冇人會阻到你。我哋英皇上上下下都會支持你，下一站紅館，OK？」說罷，已看見阿Deep眼泛淚光，激動得說不出話。

而Mani亦重提跟吳浩康多年前的經歷：「其實我一直都覺得吳浩康係得嘅，佢係失去咗一個黃金機會，不過佢年輕，仲有佢嘅本錢。雖然佢呃過我，仲唔止一次，不過嚟到今年我覺得佢成熟啦。好記得有一年佢媽媽過身，佢同我講『我好後悔比唔到一個好好嘅表現媽媽睇，同埋令唔到佢享福。』我就叫佢由嗰一分鐘開始，要努力做好呢份工，做好呢個人，做好自己呢一生。嗰一刻我覺得自己都好似佢半個阿媽咁，今日佢企喺呢個台上，我深信佢媽媽都睇到，所以將來嘅路點行，阿Deep你要自己諗啦。」