《全美一叮》比賽完仲有下一個　Celine妹妹到底有幾辛苦？

9歲「小巨肺」Celine妹妹譚芷昀早前於《全美一叮》一鳴驚人，在美國比賽過後終於返港，今日到尖沙咀出席Cafe開幕活動。Celine在活動上大讚爸爸譚順生靚仔，又專注整麵包展現童真一面。

Celine妹妹一出場自然成為傳媒焦點，面對傳媒提問Celine妹妹顯得有點緊張，未如比賽時淡定自信。來到9月新一個學年展開，被問到返回校園同學有何反應？Celine妹妹表示：「好開心！佢哋恭喜我囉！」又問到怕不怕跟不上進度，身旁的譚順生開腔話：「其實佢（Celine）都有做好多功課，喺嗰邊（美國）都有做功課，都有跟，所以唔擔心。」話晒Celine只得9歲，仍然係求學階段，今次遠赴美國參賽請咗幾多日假？譚順生都唔肯定話：「前前後後兩星期左右啦，都有十幾日。」其實又要遠赴美國比賽，又要做功課，返嚟香港仲要追學校進度，Celine妹妹都幾辛苦喎！

兩個禮拜對成年人嚟講可能返下工眨下眼就唔見咗，但對只得9歲嘅Celine嚟講就係兩回事。雖然話跟得上進度，但係兩個星期老師都唔知講咗幾多課書，同學又會一齊開心玩遊戲做勞作，呢啲童年時光真係做幾多本作業都補唔番。可能你會話Celine會有一般小朋友冇嘅經驗，但同樣Celine嘅童年變成只得舞台而缺少了校園。難怪Celine面對傳媒提問都話：「我想同朋友一齊多啲。以前冇乜時間同同學一齊返學，依家想返下學先。」

不過譚順生表示希望豐富Celine嘅Experience，所以過幾個月Celine又會參加不同比賽。Celine話：「過多幾個月可能會，我自己都鍾意參加比賽。」那邊廂話想重返校園，這邊廂又話鍾意比賽，唯有希望Celine身心能夠應付。

Celine Dion本尊公開在Twitter大讚Celine，又邀請Celine到拉斯維加斯同台演出，咁譚順生同Celine係咪真係應邀？譚順生則表示：「交畀經理人處理。」另外，被問到騷價有冇因而上升，會否作更多幕前演出，譚順生為Celine擋駕，一概以「交畀經理人處理」回應。