自資搞活動唔靠客戶 狄易達：唔想下下都咁被動
狄易達自從開辦跳舞學校、創立室內設計配對平台後，達仔的「跳舞歌手」身份在大眾心目中越飄越遠，取而代之，「老闆」的身份現在似乎更貼近達仔。不過在他自己的心目中，他仍是當天那位熱愛舞蹈的小伙子，只是除了舞台上自己的表演部份外，他現在能參與及掌握的事情比以前更多。
攝影：楊晴
最近達仔自資籌辦活動，8月26、27一連兩日在中環海濱活動空間舉行《賞想放空市集》，更邀請行內好友到場演出，他表示這個概念是回復自由身後的構思：「當我變返自由身嘅時候，我第一樣嘢係同自己講，唔想咁快做自己嘅歌曲住。因為咁樣不停做落去，我只會依然係嗰個我，都係做緊同樣嘅嘢，每個月接幾個跳舞騷、唱歌騷、拍節目，唔會有咩變化。所以當時我就去咗法國、荷蘭搵當地嘅朋友帶我去佢哋練習跳舞嘅地方，感受吓唔同地方嘅表演方式。過咗呢半年之後，我諗咗一啲關於自己表演風格嘅事情，所以就想喺呢個前提下再次做公開表演。」
其實每年達仔的跳舞學校也會有機會給學生進行匯演，今次一連兩日的表演正是每年一度的匯演放大版，達仔更邀請了圈中好友如陳慧敏、劉威煌、火雞姐可欣等參與演出。雖然有心，不過縱是天王黎明也試過在同一場地開騷，更因不合條例而「撻Q」需要取消演出，到底達仔有否作好準備，了解開騷的條文？他謂：「其實我哋係完全唔會明佢係點處理，例如我哋唔會明點樣先為之『唔得』。好坦白講，同呢類型嘅場地做嘢，其實佢最想你乜都唔好搞，最好個騷搵人上去唱，唱完兩隻歌就走。不過我哋最後都花咗好多時間去同相關部門溝通，知道有咩做得，有咩唔做得。」
深信大家最想知道，在這類型的場地進行表演到底有什麼規距要跟，達仔表示：「其實有好多零零碎碎嘅事情我哋都唔會估到原來係唔得，例如我想有幅LED牆升上去，最後我哋係好難做到，唔係話唔得，係錢嘅問題。因為原來幅LED Wall一過咗三米，佢又要另外批一個牌比你，搭多個台可能又要傾點樣過到佢嘅批核。」話雖如此，達仔仍是對當局非常感激：「始終佢哋都幫咗我哋好多，提供一個咁好嘅場地，非常低成本，佢哋又好樂意協助我哋去做一個盡量完美嘅騷，我覺得當然都係跟返政府規距啦。」
回到香港落手籌備再次表演，達仔便發現一個問題：「以往歌手做表演其實也是處於一個被動角色，因為每每也要依靠電台、媒體搞騷，我們才有表演機會。而當然這些表演大多也要因應客人要求而訂，歌手沒太多自主權，甚至演出當日你才發現，上到台上可能唱兩首歌，Say個Hi就要Say Bye走人。但作為表演者有時候上到台見到一啲好好嘅設備同製作，啲台燈聲好靚，最後原來根本冇咁多時間比你表演，十分鐘就走人，我會覺得好可惜。所以我就希望可以自己做到一啲好嘅表演出嚟，唔洗下下靠人哋搞騷先有機會表演，最後我就決定自己去試下創造呢啲機會。」
訪問當日，達仔一身黑衫黑褲戴帽現身，臉上還留有濃密的鬍鬚，感覺相當不羈。這樣一個造型放在一向「青靚白淨」的達仔身上，似乎讓人不太習慣，難道是嘗試新造型？怎料達仔卻回覆了一個「成功人士」Feel的答案：「其實我留鬚冇咩特別意思，只係太忙冇打理。有時我會覺得剪頭髮、剃鬚、襯衫係幾煩嘅一件事，可能人大個咗，每日起身要顧慮自己架車有冇整好，有冇買到咩衫，要Set咩頭，都好阻礙到自己做嘢。作為一個歌手，可能我而家要好好去選取咩時候做咩嘢，所以我分配咗呢段時間好好去諗下點樣做好個表演，到真正同大家見面嘅時候我又會執返好個形象。」這樣一個Steve Jobs式的回答，似乎達仔距離一位成功老闆又邁進一大步。