化妝KOL等足十年出歌做新人 林若盈：當時覺得好低潮
「林若盈」這個名字大家未必有很深印象，大多人會認識她是化妝師、美容KOL，其實她也是今年的女新人，於月前推出單曲《自療》。雖然身份是「新人」，但她一點也不「新手」，反之擁有豐富的比賽經驗，在07年參加英皇新秀(同屆有林聞恩、駱振偉等)，更在台灣第5屆超級星光大道總排名第13。
在台灣歌唱比賽成績不俗，理應在當地也有發展機會，為何林若盈會選擇回港發展？原來她也經歷過一段低潮時期。林若盈憶述：「當時比完賽得第13名，已經有傾一啲公司，參與節目；但中間屋企有啲事，媽咪工作出現狀況，而且媽媽有抑鬱，屋企經濟又出現問題，種種原因加埋所以就返嚟香港。」
林若盈又形容「屋企好多drama發生」，在台灣參賽唱《Love is Over》時，因為想起父母離異、自己失去父愛等等的經歷而影響表現。不過林若盈自言性格樂天，艱難的時間也能撐過去。訪問中她又提到參加比賽時的有趣經歷：「當時好驚俾人『大改造』，因為佢哋鍾意可愛風，齊陰呀，俾好多連身裙我着；我記得嗰陣係咁問人『你真係覺得件衫啱我？』，但佢哋全部係話『你就是可愛』。」今日回望當年的造型，林若盈也笑言：「無敵！無得彈！哈哈！」
回港後林若盈也需要一段時間適應：「返到香港後幾個月，覺得好低潮，因為當時喺台灣開始有人認識，但返到香港就冇人認識。而且前前後後喺台灣stay咗一年，返到香港都未可以即刻pick up番工作，因為化妝師係freelance，嗰一年冇喺香港出現所以就冇人聯絡。」幸好，林若盈得到身邊朋友的幫忙，而且在6、7年認識到現時的經理人，並得到不同幕前、幕後的工作機會；在3、4年前萌生合作造歌的念頭，到現在時間合適便推出歌曲，促成這個夢想。
人要有經歷才會長大變得成熟，林若盈表示：「有唔開心嘅事先會珍惜開心嘅時間，如果唔係就會開心到麻木晒。」而新歌《自療》想帶出的訊息正正與她的想法不謀而合：「雖然首歌聽落好似情歌，但其實想講每當有唔開心嘅事，可以當係一堂課，係一個學習嘅過程。況且，有啲嘢『一隻手掌拍唔響』，問題發生之後唔可以淨係怪對方，自己都要反思。」
經歷過不同高低起趺，林若盈形容媽媽是「最強後盾」：「媽咪由細到大都俾我好大自由度，即使做freelance收入唔穩定媽咪都冇俾任何壓力。而且出歌之後媽咪都好開心，都話會支持同睇我表演。」