【專訪】鍾鎮濤Hi-Fi碟與囡囡合唱：佢唔鍾意聽我啲音樂
鍾鎮濤（B哥哥）曾經推出多首經典之作，但近年多在內地發展的他，數數手指原來已經多年沒有推出粵語專輯，對於B哥哥來說，灌錄新碟，除非是Hifi靚聲，否則寧缺勿濫：「我希望做啲有質感嘅音樂」B哥哥說。
攝影：梁碧玲
化妝：Omix B
多年沒有推出新碟的鍾鎮濤（B哥哥），最近推出Hifi碟《a better bee》。今次推出Hifi碟，其實已計劃多時：「其實把口就講咗好耐，但係一直都想搵個好時機去執行，咁啱有一次就見到環球唱片嘅老闆Duncan，傾計嘅時候佢就問我有無興趣做，我就答有啦點會無，我自己都想喺香港做番啲嘢，始終都係個香港仔，無理由全線內地發展，所以就今次就做咗呢隻《a better bee》。其實我自己都係Hifi發燒友，做咗咁多年音樂，耳仔都尖啲，聽音樂自然會好有要求，一般用電腦做嘅音樂已經滿足唔到我，所以我依家就算做音樂，我希望做啲有質感嘅音樂。所以既然有人搵我做Hifi碟，我緊係會做啦！」
一向喜歡收藏結他的B哥哥，終於新碟把珍藏大派用場，多首歌曲結合了不少其寶貝的聲音：「今次出碟我好緊張，樂手彈嘅每一個音我都好講究，好有要求。而且同Hifi德（太極樂隊吉他手劉賢德）合作，佢仲會設計Hifi方面嘅細節，講得細緻啲，我重新灌錄《讓一切隨風》，今次有別於以往錄歌只係用一支木結他或電結他再用技術調教，而係用上好多唔同嘅真結他。而另一首《紅葉斜落我心寂寞時》又係，用上好多唔同嘅結他去做，加上Hifi德本身有收藏好多特別嘅結他，而我自己本身又係一個結他發燒友，收收埋埋有好多結他，今次呢隻碟可以拎番哂出嚟，滿足唔同音樂上嘅要求。」
談到與葉彤合作拍《要是有緣》MV，「我好開心，我同佢係因為拍電影《表錯七日情》而認識。如果大家有睇過呢部戲都會知道入面有兩首歌，分別係《一段情》，仲有《要是有緣》。今次《要是有緣》搵番葉彤合作，係因為當年佢憑著《表錯七日情》而攞影后，《要是有緣》編曲唱法加上時代感之如，MV搵佢，翻演昔日《表錯七日情》男女主角多年後重聚嘅故事，我哋仲係MV都有加插返當年電影片段，今次同佢合作，感覺真係好深刻。其實我同葉彤自從拍咗《表錯七日情》之後，我哋好老友記，到最呢幾年，我哋係差唔多每一個月都會聚一次，每次都好開心，唔講公事。今次叫到佢幫忙，佢都話當咗呢首係佢自己嘅歌，所以佢嘅幫手，令到呢首歌嘅MV更完美。」
鍾鎮濤在新碟《a better bee》把自己的經典重新灌錄昔日經典，B哥哥表示自己的演繹方式有別於從前：「其實唔同嘅時間去唱同一首歌，感覺都會唔同，歌手嘅聲音會變啦，唱嘅時候感受都會唔同，我依家唱番都覺得有好大嘅分別，好似自己跳咗出嚟睇番歌曲入面嘅故事。」
問到新碟內B哥哥再次與囡囡鍾懿合唱，B哥哥馬上四萬咁口：「阿囡佢一向都鍾意音樂，不過佢唔係鍾意我嗰啲，佢讀國際學校，所以自然都鍾意聽新潮啲嘅英文歌，所以我每次想知外國有咩hit歌我都會問佢。講開鍾懿，除咗鍾意聽歌佢真係好鍾意唱歌，所以喺今次嘅《a better bee》入面佢都有參與一首歌叫《閃閃星辰》。呢首歌亦係當年我個人發展嘅第一首粵語歌，對我嚟講呢首歌好有意義，所以今次就特意重新編曲，同鍾懿一齊合唱。」
B哥哥接著大讚鍾懿：「同鍾懿錄音嘅時候佢好乖，無乜意見分歧，我工作嘅時候我個人係會好緊張，會好有要求，同佢錄音時我都會對佢有要求，但鍾懿喺呢方面同我好唔同，佢會好心情輕鬆；佢係可以將一樣其他人覺得好難嘅嘢，三爬兩撥完成，完全係我意料之外。錄音嗰日，佢用咗一個鐘就錄完，佢只係擔心錄完音之後我會唔會帶佢去食麵！哈哈哈！」
B哥哥多次強調他很緊張音樂的成品，原來他對小朋友生活習慣，同樣緊張：「佢依家處於成長期，我好關心佢嘅飲食習慣，小朋友唔可以食太多糖份，不過今次錄音咁成功，所以我都有獎勵佢飲兩杯阿華田（吓！好似好慘）其實我都係以佢健康為先，畀佢任食會影響佢成長，你諗吓如果佢唔長高變咗打橫發展，成件事係唔係好唔過癮！？所以小朋友嘅飲食，家長係要幫手注意。」B哥哥說。
B哥哥：真係女大十八變
鍾懿曾接受傳媒訪問時表示希望做歌手，但B哥哥認為依家囡囡越大想法越多，現時似乎未有想法去當一位歌手：「我覺得佢同以前嘅諗法唔同咗，佢以前係搶住接受訪問，記者明明訪問我，佢都要幫我答，但係佢依家唔係啦，但依家我叫佢，佢都只係抱住我叫佢做佢先做嘅心態，所以真係女大十八變，佢一直都變緊，所以將來佢會唔會做歌手都未知之數，不過佢鍾意音樂係事實，以前我叫佢彈結他都唔肯彈，依家想叫佢放低支結他佢又唔肯，所以女仔真係會一路變。」
唔經唔覺B哥哥已經64歲，睇相又真係少少都唔似，而且仲好Chok得！唔信？睇下你就知！