劉德華呼籲「老婆」睇《焚城》：電影睇咗未？點都要追到破紀錄

劉德華一連廿場的跨年個唱《今天…is the Day劉德華巡迴演唱會2024 》正式開鑼，全晚又唱又跳3小時，狀態大勇之餘，撩妹金句亦頻亦出現。

個唱一開始，華仔問大家食咗飯未，並話自己秀色可餐；問大家愛幾耐時，全場大叫「愛你一萬年」後，華仔即表示「你哋以後可以叫我老公」又話「多謝所有老婆」，隨即唱出《一起走過的日子》；唱完《你是我的女人》後，華仔向觀眾介紹女樂手，並爆出一句「你是我的女人」又對台下觀眾表示「如果無人要手，搵我」。

唱到第四部分時，華仔問大家準備玩到幾點，又話「大家都帶咗pillow 嚟？準備同我pillow talk。不過我今晚返去排吓更表 ，咁多個老婆都唔知點算。」唱《情深的一句》時，華仔對住當年嘅《烈火戰車》女主角梁詠琪情深表示「我愛你」，回憶殺湧現。歌唱尾聲，劉德華表示返到屋企開演唱會有啲緊張，但係都多謝咁多位觀眾，亦趁機會幫主演電影《焚城》谷一谷票房，他說：「我下年再開睇唔睇 ？電影睇咗未？我點都要追到破紀錄！仲爭7千（萬）雖然癡心妄想，但有你哋我唔怕。」