【有片】MC Jin銅鑼灣Freestyle 街頭歌手：時代廣場首次聽到Rap
繼旺角即興Freestyle後，MC Jin昨晚又在銅鑼灣即興Rap！話說尋晚Jin 一早預告會到銅鑼灣Busking，直至晚上11時左右，現身銅鑼灣時代廣場行人通道，一到場已經引起唔少哄動，而每逢星期五晚都會在銅鑼灣時代廣場Busking的City Echo在表演，故Jin亦乖乖坐在第一行聽歌。
聽完歌後，他便站出來跟大家打招呼，全場馬上哄動，更笑言自己可以任影相和握手，加20元甚至擁抱都可以，不過就呼籲觀眾首先要靜心聽City Echo唱歌，不過當Busker JL演出中途，他又再突入Rap：「其實我真係諗住抖一抖，但係坐係到其實真係忍唔到口，我係啱啱先食完晚餐，就無啦啦嚟咗呢度銅鑼灣，呢個Time Square真係好開心，我地一齊唱下一齊have some fun，一齊繼續拍手高舉手，我地今晚不如絕對唔好走！」，之後更與觀眾大玩互動rap「我愛你，你愛我」，超正！
MC Jin同嘻哈俠兩個一樣Rap得個背影又似，大家話係唔係？
街頭音樂表演者JL接受《香港01》查詢時表示，由於Jin一早預告會到銅鑼灣，因此他早有心理準備，一直在等待，而之前都有試過同其他歌手一齊Jam歌，所以沒有特別緊張。「其實同未夾過的人Jam歌係特別好玩的，所有事情都要執生，我又唔會話真係有一個什麼等級之分，但在音樂上他們確實各有強項，例如張敬軒唱歌好勁﹑有特色，Jin的街頭rap在香港真係好少見！」他更形容：「尋晚真係so far史上見過公共空間最多人的一次！」他補充：「真係好多人，基本上企到密晒，而且更係我自己第一次在時代廣場聽到rap！雖然唔係Rap了不是好耐，最少有人rap，氣氛係其中最有反應的一晚！」
問到對Jin的印象時，JL則表示：「我有睇內地節目，我覺得佢真係熱愛自己做緊的事情，一個人唔熱愛自己鍾意嘅嘢，係唔會千方百計向呢個方面鑽研，沒有狂熱唔會不斷做呢啲嘢，另外我覺得佢係好堅持的人，見過佢tvb拍劇和hiphopman的片段，我覺得兩者光芒係唔同。」
對於近期不斷有主流歌手到街上Busking，JL就認為：「我覺得任何人可以用佢嘅能力或渠道去宣傳自己，唔可以Define busking就係For一些唔出名的人」，「我的目標係咁，覺得真係唔需要分主流定獨立」，呢啲叫咩？咪係音樂大同囉。