【專訪】入行28年幸得圈中人接濟 梁漢文：人生唔會一直都好順！
入行28年的梁漢文，事業經歷多次高低，常常被指是香港最不走運歌手之一，他是那種走出街大家會認得記得，也曾經有紅極一時的歌曲，如《衣櫃裡的男人》、《纏綿遊戲》及《七友》等，好的歌曲多不勝數，但人氣始終不如歌曲那樣，對於常被指「不夠運」，梁漢文表示：「人生唔會一直都好順，其實咁樣都幾正！」
攝影：黃國立
髮型：Moe @Fifth Salon
化妝：Maggie Lee
場地：New World Millennium Hong Kong Hotel
歌手梁漢文（Edmond）將在8月舉行《梁漢文我的另一半演唱會》，他表示今次音樂會將會唱出演唱會未有唱過的歌曲：「我前年做完《梁漢文中場表演演唱會2015》，事隔兩年籌備呢個《梁漢文我的另一半演唱會》，目的係想借今次呢個機會，想將我曾經忽略嘅歌送比我嘅歌迷。」
Edmond續說：「其實我有好多歌，之前喺紅館未唱過例如係《錯先生》，《找我》，《移情別戀》等。希望可以透過今次音樂會，可以一次過唱哂嗰啲歌比觀眾聽。今次呢個音樂會我想同歌迷有多啲互動，所以會特別搭建一個T型Catwalk舞台，到時一班嘅樂手同我就會喺條catwalk台上玩音樂及唱歌，而歌迷朋友就會圍住Catwalk台坐，相信呢個形式可以為歌迷帶嚟新鮮感。」Edmond續說：「其實我有啲歌互相係有關係而又好多人都唔知，好似《普通朋友》佢係同我之前首《好朋友》係有關係，而我首《角度》亦都係同我首《呼吸》有關係，其實我有好多呢啲兄弟歌，所以我都好希望到音樂會嘅時候可以演繹出嚟畀大家聽。
談到Edmond今年推出的歌曲《終身贊助》，歌曲滿是人情味，而且找來從小到大都影響著Edmond的街坊，朋友，同事以至圈中好友參與MV拍攝：「呢首歌係講人情味，每一個人喺成長過程入面都會遇到影響你嘅人，其實從你喺屋企出門口一刻開始，你已經接觸到影響你嘅人和事，而且嗰啲事都會離不開人情味呢三個字。而喺我身上，我會諗起學校，而且我會諗起當年嘅班主任，諗完學校，我又會諗起曾經有一個階段我成日喺一日茶記食嘢，經營呢間茶記嘅一家人好俾到我溫情，之後又諗起我嘅網球教練等等，雖然呢個MV唔係用上好複雜嘅製作，我雖然喺入面都只係行行企企，但每一個畫面對於我嚟講都有佢嘅意義係到。」
梁漢文：我覺得人生唔會一直都好順
梁漢文這個名字，相信好多人都識，出街也會有人認得，而且他有很多經典作品。但有好多人會覺得梁漢文的星途總是遇到阻滯，人氣未如歌曲紅，對此Edmond看得很開：「好多人都覺得我嘅歌唱事業欠缺運氣，其實我覺得自己入行遇到咁多好歌，計埋卡拉ok及合輯數數手指都出咗40張唱片，其實除咗我，我都見過有其他人有咁樣嘅遭遇，我覺得人生唔會一直都好順，對於我嚟講最緊要係喺唔同嘅事入面都有所學習，其實咁樣都幾正！我自己一向都好正面，樂天，好少會鑽牛角尖，唔會因為咁而好sad。」
入行28年的梁漢文向來有「娛樂圈好好先生」之稱，人緣極好，當過去28年在工作上經歷多番事業低潮，Edmond總會有圈中好有支持，例如在2001年「華星唱片」結業，梁漢文變成「孤兒仔」有舊同事為他義務工作；到2002年，Edmond要靠拍一些不會上映而直接發行的電影維持生計，當時曾志偉曾出手幫忙接工作並簽他為旗下藝人，到Edmond後來獲得當時「金牌唱片」的黃柏高賞識，志偉哥再無條件解除合約等；Edmond每次經歷低潮都會有人支持，在這個充滿是非的娛樂圈能有這麼好人緣真的不是人人做到：「其實我都唔知點樣做到，我諗係因為平時真係攞個心出嚟待人接物，相信咁多位同我做朋友嘅人會感覺到，我係一個唔會同人計較嘅人，有啲嘢係好相輔相成，大家識我咁多年會知我對朋友係真誠，唔會諗啲複雜嘢，唔會有私心。」
（你覺唔覺自己性格好和善而好易俾人蝦，喺娛樂圈會成日俾人佔便宜？）
「算係啦，可能因為我個人易商量，但我都會為應該要做嘅嘢而爭取，只不過我唔會用惡嘅態度，反而係用溫和嘅方式，我會講道理囉。其實我明白每樣嘢都有好有唔好，但我覺得呢種處事先係真正嘅梁漢文。」
問到就快開騷，有沒有什麼特別養聲方法，Edmond邊笑邊分享了一件趣事：「有啲人成日話要養聲所以要禁辣，我就無呢啲嘢嘅，我都幾鍾意食辣嘢嘅，不過我就會飲花旗蔘，老婆就會煲牛蒡水或者一啲中藥咁。不過我仲記得一樣保聲嘢，但我已經好耐無試過，大概9幾年演唱會嘅時候，我記得我，Sammy（鄭秀文），安仔（許志安），當時唔記得邊個教我哋食蛇膽保聲！聽到都覺得勁呢！仲要係生蛇膽，直接啪落去。我都唔記得點解會有食蛇膽保聲呢個傳聞，而我哋三個當時又膽粗粗走去試，我印象中當時喺開騷兩三個鐘前我哋一人一粒，但有無真正功效我就真係唔記得啦，而嗰件事發生之後嗰兩三年，就有人流傳我哋三個成日食蛇膽。依家諗起我都覺得我哋好勁！好勇！不過我依家就唔係好敢試，點知食咗會唔會有咩事，但每次諗起都覺得呢件事好有趣。」