【專訪】藝人成功需創業？ 薛凱琪做時裝老闆：我個人比較貪心
在香港一位成功的藝人歌，影，視已經是基本，隨著時代的轉變，有很多藝人更有一條「老闆癮」，好似劉德華，古天樂，古巨基甚至最近開曲奇店的欣宜也一樣，多了老闆這個身份。而歌手薛凱琪（Fiona）也「唔執輸」加入老闆行列，開設個人時裝品牌。Fiona更直言藝人做老闆令她的時裝生意有直接幫助：「啲人知道我有意做時裝生意，即刻想一齊投資開舖。」
攝影：符祥定
化妝：Jessica Chan @Jessica Chan make-up workshop
髮型：Jo Lam ＠Queen’s Private i
造型：SPIRITUNUS
歌手薛凱琪接受訪問時表示，成立時裝品牌是其夢想之一：「其實我讀書時專修裝置藝術，我當時有幾個夢想，我立志要成為導演，美術指導，成立自己品牌或者係畫家。我覺得人只要有信念，夢想終會一一達到，就好似《Secret》呢本書所講嘅信息。如果大家有留意我過去嘅作品，你會知道我曾經係我無數嘅作品入面畫過畫。導演方面，我依家大部分嘅MV都會幫自己執導，亦都有幫其他人拍MV，又試過拍攝微電影。美指方面，自己MV，CD cover及show等等，都有親自擔任美指。依家為一未實驗自己嘅夢想就係成立一個fashion brand（品牌），咁所以我就同我嘅partner仲有團隊，開始埋頭籌備呢個brand，結果用咗一年時間終於成立咗SPIRITUNUS。」
榮升老闆的Fiona似乎對今次的生意非常緊張：「我本身都身兼多職，依家成立呢個品牌連我助手都同我投訴，所以我哋品牌係會有自己嘅designer幫手設計，而唔係所有衫都係我自己設計。作為呢個品牌創辦人，我會親自監管所有嘅design。而我哋今個summer會圍繞白色同粉紅色嘅蝴蝶結為主題，希望可以令到每一位著我哋design嘅女仔都可以展現出可愛同sexy嘅一面，當然我指嘅sexy係健康嗰種而唔係過份暴露。我覺得做designer有責任提升女仔嘅自信，因為女仔永遠最靚嘅時候就係最有自信嘅時候。」
Fiona又謂今次做生意絕非玩玩吓：「呢盤生意我會跟得好足。其實我個人比較貪心，我會覺得唱歌，做導演，演員，同埋我今時今日有自己嘅Brand（品牌），其實每一樣都係我嘅正職，我對我工作嘅愛係無分大細，好似對家人一樣，我唔會話愛爸爸多啲定媽媽多啲，定細佬多啲定妹妹多啲。總之我立志做嘅我都會以呢樣嘢為先。我寧願將來放少啲假，將自己嘅玩樂放到最後，都唔會放低自己嘅生意。我今次做business並唔係靠自己一個人去做，而係有熟悉呢行嘅團隊一齊做，除此之外，我唔會三分鐘熱度，並唔係有錢投資就算。」