專訪｜ANSONBEAN與女友張天穎創作新歌契機：得我同你比較Close

跳唱歌手 ANSONBEAN（陳毅燊）最近推出首張個人專輯《ONE DANCE》，唱片封面以熊熊烈火為背景，寓意着蛻變成長，他更半裸上陣大曬爆肌身型。 ANSONBEAN接受《香港01》 專訪新專輯的創作概念、剖白初入行迷失階段，以及與女朋友張天穎公開戀情原因：「我冇諗住公開，淨係俾人哋偷拍到，所以曝光。之後我曾經出過一個活動做訪問選擇公開，係因為我見到網上一個留言攻擊緊女方，個報道佢話好早之前已經識我，想澄清呢件事其實佢冇，我都唔想啲誤會佢，同埋我哋真係拍緊拖。」

新專輯《ONE DANCE》的創作概念

ANSONBEAN分享新專輯的創作概念：「想用愛情同埋慾火嘅故事去比喻現實世界嘅成長，當係愛情可能你咩都想試吓，去到呢個花花世界地方，去到一個時間就會搵到自己真正重要係咩。」他指新專輯的次序以《OMG (on my grind) 》開始，並表示：「講一個內向嘅人喺呢個行業裏面，有好多掙扎，點樣去接觸出面個世界，會覺得好矛盾。」他繼續指之後就相繼推出《LOVE / PAIN》、《IMPATIENT》和《CALL ME (Late At Night), Pt .2》，這一批歌曲都是比較壞男孩為主。他直言今年壓軸推出的新歌《ONE DANCE》，順勢推出專輯。

對於新專輯籌備長達兩年多，他坦言：「啱啱開始做歌嘅時候諗住推出四步曲，例如好似愛情故事係有計劃過，但當冇做到呢件事，就諗住乜嘢都試吓，所以呢隻碟有好多歌都冇放到落去，例如：《聰明豆》和《you made my day》。」他指現階段發現自己想做一個R&B的歌手。他重提初入行有一段時間比較迷失，並表示：「出《OMG (on my grind) 》嗰一期需要同外面嘅世界交代同埋表達更多嘢，覺得好唔舒服，所以就寫咗呢首歌。我好多生活上嘅一啲經歷，嗰個時期點樣諗就變咗做一首歌，呢幾年我有高低起伏。」

曾自覺使用社交網壓力大

至於專輯收錄的一首作品《OMG (on my grind) 》內容曾經講述與傳媒相處的體會，他說：「個MV講啲記者係咁喺度影相，我好辛苦。其實呢一刻我都感恩同記者去分享，我覺得有人想問你嘢係一件好事，如果冇人問你嘢就更加差，嗰陣時我想用呢樣嘢去表達社交網站嘅疲勞。」他指若果不活躍使用社交網，觀眾就會忘記你，並表示：「我覺得呢樣嘢壓力好大，而家嘅社會實在太快，速食文化都好勁，放低個電話一陣就會損失咗好多粉絲。」

與女友張天穎創作新歌契機

提到新歌《ONE DANCE》與女朋友張天穎（Jaime）共同創作，他透露合作的契機：「因為我覺得對於呢一首歌曲唔係好適合自己，又唔係咁容易搵到，去到自己寫嘅時候又冇呢個能力，最後我就問我女朋友可唔可以幫手寫到呢首歌，我同佢講因為得我同你比較close，所以先表達到呢首歌，同時間我知道佢有呢一個能力。」他指與女朋友創作的時候，因為自己對於貓毛敏感，所以曾經向女朋友發脾氣，他說：「女朋友要求開始錄歌，跟住我有點炆憎自己嘅狀態，所以個語氣唔係咁好，所以突然之間哼出嚟嘅感覺就有啲後悔，想表達呢一種感受俾佢聽，而改變咗原本唔想唱慢歌嘅構思，呢一場意外就變咗首歌講後悔和承諾、成長嘅一首情歌。」

剖白公開戀情原因

被問到當初大方向傳媒公開戀情一事，他坦言：「我冇諗住公開，淨係俾人哋偷拍到，所以曝光。之後我曾經出過一個活動做訪問選擇公開，係因為我見到網上一個留言攻擊緊女方，個報道佢話好早之前已經識我，想澄清呢件事其實佢冇，我都唔想啲誤會佢，同埋我哋真係拍緊拖。」他坦言自己有思考過公開戀情的問題，並表示：「嗰一刻我覺得事情都發生咗，所以都係天注定，我哋兩個都溝通好，我哋覺得都冇乜嘢嘅，兩個都冇做錯事，我哋都係拍拖啫！」提到二人拍拖的生活小趣事，他說：「我哋會每日分享三件小趣事，一段關係都要維繫，就算係感恩嘅嘢都會開心啲，同屋企人都會咁樣相處嘅。」

Hair : Milk Chan @ Xenter Salon

Make up : Zoe Fan

Wardrobe : RICKYY WONG STUDIO

場地提供：FWD HOUSE 1881