【專訪】自爆唔夠「男人」又驚青 沈震軒：咩都係靠阿媽！
在TVB由小角色做起，不少藝人在中途或許已經放棄繼續追夢。而沈震軒在2007年加入TVB，多才多藝的他沒有操之過急，反而是一步一步打好根基，後來終於有機會憑劇集《使徒行者》打響名堂，直至近年更進軍內地，歌手演員雙線發展。旁人認為事業一帆風順的他，原來也曾經住劏房、捱麵包度日。
Make Up：Janice Chan
Hair：kel@HH
攝影：梁碧玲
去年離開TVB，很多人認為，沈震軒捱了一段長時間，在事業轉向順利才離開，是一個很大膽的決定。「我又唔覺得呢個決定令我有任何遺憾，人生有好多嘢係要放膽去做，在現階段我想做很多自己想做的事情。我的生命很有趣，每一個十年也會帶給我一個改變。在11歲左右，我便去了加拿大，由很熟悉的香港，變成在一個很陌生的城市生活，看的卡通片、認識的朋友、說的語言全都不同了。所以我覺得到了人生某一個階段，我便要離開自己的comfort zone，我離開TVB時剛剛是做了九年，拿不到十年金牌，不過我覺得自己是時候要再進步，故此便離開了。」Sammy如是說。
提起最想挑戰的角色，沈震軒原來最想飾演父女的戲份，更坦言憧憬自己將來能生個女兒。不少人也擔心如果生女便要擔驚受怕，怕她學壞、怕她被人傷害，沈震軒卻似是一個較開放的爸爸：「將心比心，我屋企人都會擔心我，但係我會希望自己嘅仔女可以踫吓釘，當然我會喺佢哋身邊扶持。因為反而樣樣嘢太過保護佢哋就唔係咁好，我自己成長嘅過程都試過踫釘。你唔好睇我而家咁嘅樣，以前喺加拿大嘅時候，我一直都覺得自己好唔「男人」，成日都驚驚青青，我諗就係因為太習慣比屋企人保護。」
直至回流香港，沈震軒終於學會自己解決難題：「嗰時返到香港，真係買卷廁紙都唔知幾錢，交卡數又唔識，咩都係靠阿媽。後來自己出去租屋生活，終於要學識靠自己。我最深刻係嗰時啱啱入TVB，人工唔係好高，住喺尖沙咀嘅劏房，仲要計住每日唔可以用多過50蚊，如果唔係我就無錢交租。當然我唔敢同屋企人講啦，唔想佢哋擔心，所以我好感恩，喺我去到一個無辦法嘅時候，身邊嘅兄弟朋友同我講『有咩幫手要出聲，幫到一定幫』，就靠佢哋幫我渡過咗難關。呢啲朋友有啲係圈外有啲係圈內，我到而家都好感激佢哋，例如一齊返藝員訓練班嘅張景淳、李興華，嗰段時間真係互相扶持。」
沈震軒和張景淳二人同是參加無綫電視《TVbeople》選拔中獲勝而加入TVB，更一起拍過宣傳片。