【任噏樂評】MC Jin 英文Rap係原罪 《中國有嘻哈》第4集出局？
《中國有嘻哈》節目一出街各方面備受質疑，唔單止被指抄襲韓國人氣節目《Show Me The Money》，搵吳亦凡做評判畀人感覺「擺明想捧佢」；而且仲要搵佢嚟評MC Jin有冇資格入圍，簡直就同幼稚園生捉大學教授錯字一樣，話晒MC Jin以前都Rap贏黑人揚威過海外。
講番轉頭，《中國有嘻哈》呢套「喜劇」日前推出第4集嘅預告，標題寫住「嘻哈俠恐面臨淘汰危機！？」，本身都以為係標題黨啫，嚇我唔到嘅！
點知睇埋內容就覺得唔對路，MC HotDog嫌MC Jin Rap太多英文，仲話：「英文真係的稍嫌多了一些，我真係的希望我們第一季出來的，不應該是英文那麼多的！」聽完MC HotDog咁講，MC Jin都即刻擰晒頭，一臉不屑咁向鏡頭揮手後就轉身走人。
MC Jin呢集係咪真係被淘汰就未知住，但內地節目又因語言問題去否定參賽者就肯定係。
MC Jin前幾集出場都係「三語廣播」，廣東話、英文、國語都出齊，始終「ABC係佢係佢」，英文咁拿手冇理由唔出招啦係咪？而且用無論邊種語言MC Jin一樣砌到Flow，歌詞一樣有態度；再者，能夠自如地運用三種語言去Rap有幾多參賽者做到先？
內地節目似乎都幾「排外」，好似講廣東話就一定冇運行咁。早前譚淇淇參加《中國有嘻哈》就因為堅持Rap廣東話而被叮走，喺節目閃現過幾幕就唔見影。再者Rapper Al Rocco喺海選時候，表現驚人，聲底十足黑人Rapper，以全英文詞獻技後，張震嶽第一個反應係問佢：「Can You Speak Chinese？」MC HotDog都話：「可是整首英文。」最終Al Rocco都係被淘汰。
之前湖南衛視節目《我想和你唱2》入面，歌手麥貝夷被安排做「素人」都算喇，同內地參賽者鬥唱廣東話歌都輸，就節目入面林子祥同韓磊力撐都冇用。
再講遠啲，2014年《中國好聲音》第三季入面，樂隊Killersoap主音陳樂基雖然憑《月半小夜曲》入圍，但係到中段與張心傑「單挑」唱《光輝歲月》時，唱廣東話嘅陳樂基就算有幾靚聲，演出有幾穩定，唱得有幾高音都係要輸。唔係話要盲撐陳樂基，但係以事論事，從聲底、音色控制、音域等等，都比只保持「搖滾唱腔」音色沙啞嘅張心傑優勝。
講到尾，內地節目充滿套路，一切都是套路。
陳樂基唱廣東話版《光輝歲月》落敗。