麥貝夷靠內地節目翻身 玩直播吸金5位數：我31歲都想賺多啲錢！
「你我情如路半經過，深知道再愛痛苦必多…」聽完呢兩句相信大家都會記得係來自張智霖（Chilam）及許秋怡嘅經典合唱歌《現代愛情故事》，但大家又記唔記得幾個星期前，香港歌手麥貝夷因為參加湖南衛視音樂節目《我想和你唱2》唱過呢首歌而獲得唔少網民賞識呢？
【我想和你唱】麥貝夷「被安排」變素人：節目組唔畀提我係歌手！
近年香港有歌手陳偉霆到內地發展，由「而我不知道陳偉霆是誰」，到「人人都知陳偉霆是誰」。其實內地市場之大，對於香港artist來講，真係可以為佢哋帶來「翻身」嘅機會。好似香港歌手麥貝夷，之前如果唔係上過《我想和你唱2》，可能更加無人知佢係一個歌手。上完內地節目後嘅佢，果然大有不同，以往麥貝夷在內地直播平台開網上直播最多只有幾萬人收看，但自《我想和你唱2》播出後，直播收看人數由幾萬升至幾十萬，足足多了一個零。而且直播所收得嘅「送禮」由3位數上升至接近5位數。
歌手麥貝夷接受《香港01》電話訪問時直認上完內地節目，為31歲嘅佢帶嚟新希望：「我上節目前，真係諗過因為收入問題而唔再做娛樂圈，打過另一份工。屋企人年紀大想退休，屋企得我同家姐兩個女，唔可以要家姐一個撐住頭家，我好擔心日後如果屋企人有咩頭暈身㷫會負擔唔起，不過最近上完《我想和你唱2》之後，真係唔同咗，為我帶嚟曙光，工作量多咗，雖然唔係搵得多，但起碼有一個穩定嘅收入。」
「上完《我想和你唱2》之後，我個世界真係好唔同。以前直播最近只係有6萬人睇，依家升至近90萬，而且直播所收得嘅「送禮」由520個金幣累積至9500個金幣，雖然直播平台嘅金幣唔係同人民幣１對１計算，但係總好過520個金幣。（怕唔怕俾人話你鍾意搵人民幣？）人民幣都只係一種貨幣，我已經31歲人都想賺多啲錢，減少屋企人負擔。」麥貝夷笑然。
麥貝夷除左微博或內地平台粉絲人數直線上升，香港嘅工作亦有所增多：「其實我好多謝一班嘅網友支持，節目出街後，喺Facebook有好多人肯去share條片，當時個Facebook真係洗咗版，令到我可以喺香港多人識咗，工作自然多咗。最近就多咗活動嘅邀請，同埋都有接唱歌嘅job，有時又會收到一啲KOL形式嘅工作，出一個product post就有收入，而內地方面，依家有一部網絡電影接洽緊。」
捱到31歲終於有人認識嘅麥貝夷，雖然賺錢唔多，但佢似乎已經好感恩：「以前好多香港人唔識我個名，唔知我係一個歌手，最多只會講我係唱《勾手指尾》嗰個女仔，依家真係好唔同，喺香港會有人叫得出我個名，喺內地因為我上節目嘅時候著咗條紅色嘅連身裙，所以網友會叫我做紅衣姐姐或者係小麥姐，雖然有唔同嘅花名，但係只要大家記得我，我已經好滿足。」