【任噏樂評】劉子千有條件做第二個周杰倫！聽完就知佢有料到

劉家昌與甄珍離婚多年，今年5月劉家昌於facebook發文大罵甄珍與兒子劉子千是「畜生」、又指「你會死的很難看」，言詞狠毒。日前甄珍發千字文反㨻劉家昌的指控，而且爆出劉家昌豪賭成性、離婚不斷要錢、威脅劉子千唱《唸你》等內幕。(傳送門：甄珍大爆劉家昌不斷索錢　不再沉默：希望他放過我和子千！)

被逼唱《唸你》事件曝光後，有網民為劉子千平反，希望佢可以做番自己風格嘅音樂：「期待也歡迎你以第一張專輯的姿態回到樂壇，面對惡勢力勇敢站出來，老天一定會替你與媽媽討回公道！」又點名提到《玫瑰》、《佔據》等等收錄在第一張專輯《Mr.Why》的歌曲。

既然網民講到劉子千第一張專輯《MR. Why》係滄海遺珠，又留言為佢平反，即管聽一聽，睇下係網民「逢黑必捧」定係真係有才華？

咦！劉子千真係有料到喎！

先唔講其他，劉子千包辦《MR.Why》入面10首歌嘅作曲、編曲，你估咁易呀？仲要風格多變，Soul、R&B、Funk、Rock Ballad、情歌，等等都有。

你可能話，「唓！佢出生音樂世家，又出國讀音樂，要做到有幾難呀？」
公平啲，正常人都識講嘢，要你用10種語氣演繹10段唔同嘅講辭，都唔係咁容易啦係咪？你估個個係吳亦凡識Freestyle咩！

你可能又會話，「要我即刻做實唔得㗎，你畀時間我練咪得囉！」
You got the point , man！玩音樂唔係真係得個「玩」字，要落苦功㗎，麻煩你打開隻耳仔，咩都試下聽啦。

專輯打頭陣嘅《佔據》已經聽到劉子千嘅功架，淨係講聲線，已經唔係《唸你》嗰隻「鴨仔聲」。歌曲冇intro，直入就係鋼琴加劉子千人聲，真假音轉換做得到位，高音又唔會讓人覺得刺耳，轉音又唔係夾硬扭，起碼聽完你個腦唔會聯想有個人面容扭曲喺你面前聲嘶力歇唱先啦。

另外推介《住在動物園》，因為個音樂底夠groovy，一聽就想跟住郁，而且intro鋼琴重覆住同一句旋律catchy，好快就帶你入局，聽完就發現「原來劉子千唱快歌都得喎！」

「這世界 各種人吃一樣的米
發生什麼都不稀奇
所以 不需要太為難自己
生活不過只是場遊戲」

相信劉子千依家睇番呢幾句歌詞，一定百感交集。

其實唔係要捧到劉子千天上有地下無，因為佢隻碟主打歌《MR. why》都幾好笑。的而且確，舞曲風格嘅音樂底唔錯嘅，起碼唔係《唸你》嗰啲老套嘢先；不過佢一rap就好似總係同佢把聲格格不入咁。睇埋個MV就仲大件事，睇到佢手揈揈個樣，我第一時間諗起「加加減減，減減加加，加嚟加去，減嚟減去」。唔明請Click

拉勻嚟講，《MR.Why》隻碟睇到劉子千作為個唱人嘅實力，唱、作、編都能夠一手包辦 ，而且唔係「整罐頭」; 不過正因為各種風格都有少少，個人風格唔夠鮮明，唔似「方大同=Soul Boy」、「黃貫中=Rock友」，但可以好肯定講「劉子千唔等於《唸你》」。

睇埋劉子千唱Live，穩陣過好多人啦，係咪？