【畀人笑英文名】𠵱家越嚟越多鬼佬，都係亂咁改名

你有英文名嗎？指嘅唔係Lai Ming之類嘅拼音，而係Leon嗰種英文名。相信百份之九十幾嘅網民都會有。如果唔係老豆老母幫你改嘅，咁你個英文名點嚟？有冇諗過，點解要改英文名？或者有冇諗過，你嘅英文名會唔會比人笑？

小學時，唔知做乜老師要我改個英文名，老豆幫我揀Timothy。當年我冇問點解，多年後我先知道因為鐵摩達頓（Timothy Dalton）嗰期演緊占士邦，而我老豆好鍾意。到中學，老豆走佬，我就自己改名做Ivan，直到而家。改英文名某程度上反映性格，同當年中學嘅我一樣，呢個名從冇引起咩討論或爭議，唔型亦唔怪雞，頂多係多年後歐遊或做嘢，特別係遇到東歐人，會奇怪做乜一個香港人改個斯拉夫名。

但，有啲東方人（中港澳台新馬都有），改啲所謂古怪英文名，就畀鬼佬鬼婆指指點點，甚至拍片取笑批評。唔止，仲有外國人（例如Beau Jessup），因為「睇唔順眼」，索性幫你地改英文名，等你哋唔使出醜云云。有民族優越感之餘仲可以收錢，真係一門好生意。

東方人改埋啲怪雞英文名，例子一大堆，簡單舉一啲我見過嘅例子，講中你就唔好意思，唔係我笑先，鬼佬話先。

姓名不分系：多數係球星明星之類，例如叫Beckham叫Durant （自己話自己毒L？）。睇報紙話有小朋友叫Klimt，香港有幾多人識乜水？

牌子系：叫Chanel又有（創辦人真係叫Chanel，不過係姓唔係名），叫Prada Sony Swatch都有，而鄭伊健真英文名就叫Dior（唔係Ekin）！

外文系：日系特多，Yuki Suki一街都有，希臘諸神亦見唔少，Apollo， Icarus甚至Zeus我都見過。叫Hermes或Nike嘅更加唔知歸入外文系定牌子系。

飲食系：Apple Lemon Mango Coffee都十分常見。

亂咁嚟系：陳松伶原本叫Nadia，後來加多個N叫Nnadia，提示Never give up喎，最後都係Give up，就變咗Aida。台灣歌手蘇慧倫叫Tarcy，因為佢見到Tracy個名覺得幾型，但覺得雜誌串錯字。759阿信屋白頭佬林偉駿叫做……Coils Lam。佢檔759 CEC本業就真係做Coils，仲叫「Coils Electronics」。

唔知做乜系：早排遇過有個叫Princess嘅，我研究咗一陣先肯定呢個係英文名唔係佢銜頭。以前個同事叫Never，仲姓Wong（此人好出名的說）。大學時識過個女仔叫做Wanka，自己諗笑位在邊。

最經典係，有同學叫自己Hitler，姓名不分系外文系亂咁嚟系三樣中晒。

笑夠啦可？定笑咗好多年唔識笑？畀個好消息你，而家越嚟越多鬼佬，都係亂咁改英文名的。正所謂七到盡頭變成型，以前鬼佬覺得我哋好低能嘅嘢，而家自己做返晒！

以前鬼佬亂改名，都唔係冇，但一般嚟講係啲「低等鬼」。黑人就出名鍾意亂咁嚟（以文化白人「普世標準」而言），好多英文名一睇就知係黑人（或其他少數族裔），經濟學家做過研究，用呢啲名求職，成功機會低過用白人常用嘅名。有啲係教育程度低或唔小心串錯字，NBA球星「閃電俠」Dwyane Wade個名就應該係咁。有黑人女嬰改名叫Elyviya，畀你估下原本佢想串乜字。有啲就只係貪過癮，例如另一NBA球星高比拜仁叫Kobe，就係因為老豆睇餐牌見到神戶牛。另外仲有黑人叫Precious（同名電影都拍過），有叫Goodluck——尼日利亞之前有個總統就叫Goodluck Jonathan。

明星又如何？ 桂莉芙柏德露（Gwyneth Paltrow）個女，就叫Apple，好有港味。其實上一代嘅，華堅（或叫祖亞昆）馮力士Joaquin Phoenix，以前係叫Leaf。佢亡兄里華馮力士，死前係一代型男，英文名叫River，冇改過名亦唔係藝名。家族仲有Summer同Rain，都係演員，呢啲名就同香港人一樣，激死文化塔利班白鬼。

咁當然，明星又點同？你係桂莉芙柏德露，你個女叫Apple叫Samsung都唔會有人敢笑。吳彥祖美國出世美國大，絶對唔係阿毛，佢個女叫做Raven。當然都有鬼佬改名做烏鴉，但一般係黑人。咁不過，老豆係吳彥祖，你叫Lukchard都係咁型的。

呢種風氣，而家燒到去普通人了。早排睇網站公布2017年最受矚目嬰兒英文名排行榜，里華馮力士嘅River榜上有名，菩提Bodhi奧林比亞Olympia都有份。但最令你啤一聲嘅就當然係榜首嘅……Bear！真係吹到Bear Bear聲。

我知，有Bear Grylls，但佢出世唔係呢個名嘛。香港籃球員梁民熊都叫Bear，呢啲以前會畀鬼佬笑，而家可以大條道理反擊。

事實上，我覺得白鬼笑人改英文名，就算唔係文化霸權，都係文化偏見。當然叫Wanka之類好不智，但改Candy Cherry都畀人話似雞似脫衣舞孃就Going too far。更甚係有啲東方人，以為學曉胡語就罵漢人，改Fanny又話係陰道Dick又話係陰莖——但我以前老細，正宗英國鬼又讀過大學，就係叫Dick兼且絶不介意大家咁叫佢（當然佢唔係姓Head）

講到尾，都係Your face your fate，你係鬼佬係靚仔咪做乜都型。香港人改名做Getsby （早幾年睇報紙見，仲要唔係Gatsby，係Getsby）咪冇文化亂咁嚟出醜，外國人叫「激烈的海膽」咪好得意——咁當然前提係嗰個係科大法國仔唔係執垃圾打劫的非洲人。

最後一講，其實外國人做乜改中文名？好多係為型，為得意，為溝中港台妹，或者為咗去呢啲地方做嘢，所以有時亂改大家都一笑置之。咁同樣道理，其實有冇諗過點解香港人要改英文名？當然澳門人中國人台灣人新加坡馬來西亞華人都會，但就好似只係中港台澳新馬華人先改？你總唔見韓國人日本人改英文名，大大個英殖印度，大把人在英國美國生活甚至打入主流社會，都用返原名，冇人改名做Ivan Singh。

點解華人先會改英文名，原因好多，不在此討論。但肯定嘅係華人改英文名，出發點及傳統都同外國人唔同，根本亦不可比。既然多數人都唔係教徒，點解改名要在堆聖名中揀，或者英文字典入面有先係正統？ 中文字典夠冇「激烈的海膽」，冇華人會教你咁改。

（本文純屬作者意見，不代表香港01立場。）