【每逢大事講故事】爭奪摩蘇爾 由一場紐約鍊到巴黎的賽車說起
百幾年前嘅歐美，街上行嘅係馬車，雖然汽車已經面世，但啲人仲會話，「Oh my god！啲車行得咁快真係好牙煙」，寧願用一日時間由倫敦坐馬車去劍橋，速度都係快行路少少。當時汽車嘅前衛程度，大概就好似而家無人車咁。呢個時候，美國人同法國人決定搞一場大龍鳳——由紐約一路揸車到巴黎。
呢個，就標誌住摩蘇爾噩夢嘅開始。
呢邊廂，汽車業等住起飛......
1908年，一戰未發生，而中國仲係清朝。喺嚴冬之中，紐約時代廣場有25萬人聚集，見證歷史時刻。美國、法國、德國同意大利車手已經蒙頭入閘……整裝待發先啱，準備踏上長征。整個行程用咗169日，當中包括冰天雪地横越西伯利亞嘅荒蕪雪地，以果時嚟講真係玩命之旅嚟。搞咁大陣仗，事關當年汽車業正處於萌芽階段，一於搞壇嘢旺一旺個場；而同一年，福特亦出產咗第一款大型生產汽車Model T，一場汽車革命蓄勢待發。
果邊廂，中東掘到石油......
呢個時候，有個英國人George Bernard Reynolds喺遙遠嘅中東歡呼：「同我繼續掘！」伊朗喺當時仲叫波斯，阿George喺呢度3年又3年，搵石油搵咗足足7年，家吓終於聞到原油陣除喇——無錯，原油係有種獨有嘅硫味。1908年5月26日，一行人掘到清晨4點，石油突然噴注而出，好似係黎明時分嘅波斯放了一場黑色煙花，油柱足足有成25米高，即係有成8層樓咁高。
喂飛雲搞乜講故仔講到成套《雲圖》咁，講咗咁耐摩蘇爾影都唔見……咪先！
......摩蘇爾到底喺邊？
問得出呢個問題，飛雲都要讚吓你——即係你知佢唔係人名，恐怕已經叻過唔少人，如果你仲問得出「係咪即係阿勒頗啲friend」，飛雲真係拍晒手掌呀。嗱飛雲絕對唔笑人，香港地本身已經日日新鮮鑊鑊金，打工仔每日有半個鐘碌下新聞已經偷笑，何來咁多時間睇中東地圖丫。
伊拉克之珠 唔珠好過珠......
摩蘇爾而家係伊拉克嘅第二大城市，人哋叫佢做「北伊拉克之珠」，哇叫得乜乜之珠，仲要做過英國殖民地，都唔慌好彩得去邊。摩蘇爾被ISIS進佔近3年，戰火蹂躪咁耐，錯就錯在一樣嘢：石油。
是咁的，如果你中一有聽書，應該知道有樣嘢叫新月沃土，而如果你有聽周杰倫，應該都知有樣嘢叫美索不達米亞……
......佢呢身造型，真係令人好懷念。
講返新月沃土，巴比倫你識唔識？
美索不達米亞大概就位於今時今日嘅伊拉克，亦係新月沃土嘅一部份，擁有幼發拉底河同底格里斯河，孕育人類最古老嘅文明。當我哋話中華文明有5000年歷史好巴閉，人哋公元前6000年就開始有灌漑系統，前2500年就有燃油燈，仲識焗麵包同釀啤酒。巴比倫王國飛雲細細個就聽過呢個名，佢就正正係呢個地方建國。呢片土地位處平原，四圍都無天然屏障，易攻難守，咁大嚿肥豬肉，當然係不斷嘅被人入侵啦，政權不斷換畫。
而摩蘇爾呢個地方，位處底格裏斯河的兩旁，物資豐盛，椰林樹影，水清沙幼，係當地嘅文化、工商業重鎮。果度有公園、浴場、美食等等，仲聚集一眾文人雅士，十世紀果時嘅學者覺得「簡直係perfect池」，唯一就係嫌啲風太大聲囉。
摩蘇爾呢個地方好巴閉，雖然係伊斯蘭城市，但喺聖經入面都好有戲份架喎。佢曾經係亞述帝國嘅古都尼尼微（Nineveh），聖經話尼尼微大到3日3夜先行得完，連先知約拿都要去尼尼微傳教，時至今日，當地都仲有唔少亞述人信奉基督教。摩蘇爾喺637年被阿拉伯帝國征服，從此被伊斯蘭化，直至16世紀被納入奧斯曼帝國版圖。
中東有油 仆倒去掘
咁關阿George兄咩事呢？事關阿George發現嘅油田，係中東地區第一個大型原油礦。19世紀末、20世紀初，醒目嘅英國佬早就估緊石油會取代燃煤成為主要能源，所以先喺中東周圍掘。一掘到第一個油礦，簡直好似美夢成真，更加成立咗英波石油公司（Anglo-Persian Oil Company），當年喺倫敦IPO時，英波嘅股票喺30分鐘內被搶購一空，而呢間公司就係大家熟悉嘅油公司BP前身。加上美國同時又帶起汽車革命，又起路又起廠，遲啲仲起埋飛機，無油真係搞唔掂。咁美國人就好彩啦，本地就有石油，而英國果時仲未搵到北海油田，咁點算？英國人最叻係咩呀，自己無咪向外搵囉，好似大英博物館本來都無木乃伊架。
咁作為生意人，可以平嘅你點會想畀錢。當時嘅英國仲好積極周圍發展殖民地，對住中東心思思咗好耐。終於等到1914年機會嚟喇！一戰爆發，奧斯曼帝國參戰，加入德國同意大利嘅同盟國陣營。哇英國就打得起勁囉，打奧斯曼打咗一年就瓦解咗人哋嘅行政機關，1917年就佔領埋伊拉克嘅巴格達同摩蘇爾。
既然一戰未完就大局已定，列強作為「準戰勝國」梗係要爭先分吓餅仔啦。當時英、法、俄好早就湊埋一伙喇，但俄國好快就忙緊搞革命唔得閒聯絡感情，咁英法兩個friend子就自己喺凡爾賽宮圍埋密傾喇。
當時法國總理Georges Clemenceau同英國首相Lloyd George見面，兩個George(s)口味好相同，都「猴」住摩蘇爾……啲石油。一開口，法國總理就問：「先生有咩睇啱呀？」英國首相快人快語：「摩蘇爾。」當時英國軍隊手上有伊拉克同敘利亞，法國人諗一諗，無摩蘇爾要返個敘利亞都無話唔好，爽快同意，「仲有咩需要？」「耶路撒冷。」簡直好似飛雲填點心紙咁呀，一盅頂點灌湯餃，一籠大點燒賣，你就食個乾燒伊麵啦，中東嘅亂局就由此起。
咁伊拉克人梗係好唔滿意啦，又起義又盛，搞咗一輪，英國人就搵咗麥加領袖個仔做伊拉克國王，再搵埋啲前奧斯曼遜尼派精英一齊管。新國王費薩爾一世（Faisal I）係候賽因家族成員，聲稱係先知穆罕默德嘅後人，英國人話九成伊拉克人都buy佢架喎，係囉，英國人話囉。
伊拉克人好唔「gur」，一直有大大小小嘅反殖民活動，到1958年終於獨立到喇，趕走咗英國人，但國家內部依然一直動盪。但你有你嘅生活，歐美都有歐美嘅忙碌，一戰完咗，條氣都未唞順，又大蕭條又法西斯納粹又二戰又盛……愈多呢啲鐵與血嘅事件，對石油嘅需求就愈大。
深度閱讀：【專頁】伊拉克軍隊步步進逼摩蘇爾 ISIS末日倒數 緊貼最新戰況
唔小心使大咗......喂磅住啲石油嚟先
二戰當中，石油成為重要資產。戰機、坦克、車，全部都要燃料，打起仗嚟與其斷你糧，不如炸你油。完咗場仗，歐洲因為用晒啲煤，迎來第一次能源危機。隔住個海嘅美國，淨係二戰同越戰嘅用油量，已經多過成個油田嘅產量喇。美國佬仲有經濟活動呢，仲要揸車呢，仲要夜夜笙歌呢，仲要係威係勢咁做世界大佬呢，用石油用得愈來愈勁，唔入口就唔夠駛，用嘅份量佔全世界三分之二咁多！咁點算？又係果句，自己無嘅，人哋會有嘛。
成件事真係好déjà vu，但人哋中東唔似得奧斯曼咁向西方宣戰喎，點先可以借啲意插隻腳埋去呀？唔怕喎，美國好和平好鍾意幫人手架嘛，拍晒心口咁，中東咁多戰亂，大把機會介入啦，就好似90年代初嘅波斯灣戰爭咁。同埋喎，人哋無宣戰都係人哋講姐，美國堂堂大國，屈吓人有大殺傷力武器幾咁閒丫，就好似2003年開始、一直打咗8年嘅伊拉克戰爭咁。
戰爭就係咁，有人血流成河、家破人亡，有人只係一邊打、一邊睇住有無肉食，等住幾時分豬肉。摩蘇爾作為要被分嘅豬肉，係兩場戰爭入面都尚算安全，英美喺2003年前列佢做禁飛區，直至美國直接攻入摩蘇爾，但少不免都受到戰火摧殘。
呢班外國人，喺人哋嘅土地上打自己嘅仗，打完之後拍拍屁股就走，無重整經濟，反而建立個會增加宗教種族矛盾嘅政制，仲助長咗恐怖主義，呢個業報嘅故事，相信大家都聽過好多次。
人來人往，大家齊來爭櫈仔
一班人走，一班帶住黑旗嘅人又入嚟。ISIS喺2014年攻入嚟，一夜之間，摩蘇爾人生活模式大改。ISIS貪咩，咪又係石油。摩蘇爾唔單止喺敘利亞同土耳其邊境附近，四圍仲有唔少重要油田，仲有條通往土耳其嘅輸油管。有油就有資金，成為ISIS嘅重要據點同大水喉。
而家伊拉克政府軍同美軍一齊收服緊摩蘇爾，但講得係肥豬肉，又點會只得咁少人「捕」緊。摩蘇爾一空，各方勢力就鬥快爭櫈仔。美國見俄羅斯係敘利亞打得有聲有色，呢個時候唔加力度就實喺中東蝕底；伊拉克北部嘅庫爾德人本來有個自治區，趁亂點會唔打劫？嗱嗱聲出動霸個靚位，專揀油產豐富嘅地方，例如出名多油嘅基爾庫克；仲有就係土耳其，仲記住奧斯曼時期嘅美夢，成日想將摩蘇爾納入勢力範圍，一路喺摩蘇爾20公里外訓練民兵。
ISIS喺摩蘇爾，如無意外都氣數將盡，但收服咗摩蘇爾，先係另一場鬥爭嘅開始。趕走狼群，啲老虎獅子又再嚟爭，人道災難實在難以避免，對呢啲慘絕人寰嘅事，飛雲真係笑唔出。
深度閱讀：【專頁】伊拉克軍隊步步進逼摩蘇爾 ISIS末日倒數 緊貼最新戰況