【每逢大事講故事】朱克伯格同志如何領導Facebook翻過萬里長城
Facebook連續14個季度都業績增長，但有分析就指，2017年Facebook廣告市場將會飽和，營利增長會開始放緩⋯⋯嘩，一聽到呢啲字眼，飛雲頭就好痛，簡單啲嚟講，即係呢個井已經比我抽乾啦，惟有掘個新井啦！
但Mark Zuckerberg朱克伯格（飛雲睇住佢結婚生仔，叫聲朱仔好有親切感）身為社交媒體龍頭企業揸Fit人，又點會甘心於掘井呢？要掘，就梗係掘金啦！
中國市場就好似一個未開發哂嘅礦坑咁，點解係「哂」？你明知入面有金掘，但問題係你交咗申請表未先？隊尾喺黑龍江呀，Twitter都排緊隊，你識普通話就打到尖咩？來來來，讓領導先排！外國企業想分一杯「金」，就必須有所覺悟。
若要成功 必先自宮
想打入中國市場，Facebook就一定要加入中國色彩，Linkedin，微軟Xbox live都係咁。少年，你睇吓Uber，一開始信誓旦旦要打入中國市場，同中國本地Call車公司滴滴出行鬥燒錢鬥到最後，都係賣咗中國業務比人，喺中國，係冇過江龍呢回事㗎。
中國官媒《北京日報》明言：「互聯網已經成為今天意識形態鬥爭的主戰場。」戰場上，又豈會容許你妖言惑眾？
至於令中國唔侵Facebook同Twitter等外國勢力社交平台玩嘅原因係，2009年新疆七五事件中有疆獨分子用Facebook作為聯絡平台，Facebook簡直係顛覆國家嘅同黨添啦。
此後朱仔就一直努力不懈想翻過呢個「網絡長城」（Great Fire Wall），包括學習號稱成年後最難學成語言之一嘅中文，同埋係天安門呼吸住充滿中國特色嘅新鮮空氣跑步，連中國網民都表示：「不要命了，作為土著我都不敢在外面多呼吸。這吸慣了洋空氣，在這裏跑步，不怕中毒？」中國特色嘅錢，用條命賺返嚟㗎陰功。
北京上訪之旅
2009年被封鎖後，2010年朱仔記馬上到訪中國「度假」。大企業家放假又點同我哋呢啲廢青淨係識飲飲食食，要飲，都要同領導飲！當地仲只得26歲嘅小朱，就同新浪、百度同埋中國移動嘅CEO飲杯茶食個包，傾吓對中國互聯網事業嘅發展大計。不過就真係做死啲傳媒，種種猜測一波未平一波又起，一時話Facebook會比百度收購，一時又話同人人網（可視為中國版Facebook，喺中國梗係咩都有中國版啦）正面對決，講嚟講去原來咩都得個桔。
再戰北京
2012年，朱仔強勢回歸中國！而今次仲有陳慧嫻陪住佢添。吓？？？陳慧嫻？全因佢位華裔老婆（當年仲係女友）Priscilla Chan咁啱同歌手陳慧嫻同名，搞到有洋人以為此Priscilla即彼Priscilla！朱太同陳慧嫻個面相都相距甚遠喎師兄。
咁不如又扯開話題一講講呀朱太先？
朱太嘅父母係越南籍華人，原本來自中國，但喺越南住過一段時間，再以難民身分申請到美國。父母經營一間中國餐廳而日夜操勞，所以Priscilla同2個細妹都係由祖父母湊大。朱太年紀輕輕已經非常有大志，希望入讀最高學府哈佛，高中校刊更以「級際天才」形容佢。最後Priscilla如願以償考入哈佛，更邂逅咗未來老公朱克伯格。畢業後更進修攞多一個兒科醫學Degree。
Priscilla為人非常低調，甚少以個人身分接受訪問或出席公開場合，除非係宣傳佢同老公合辦嘅慈善基金。而據聞佢為人都相當慳家，一次佢同姑仔Randi行街，睇中一對600美金（4680港幣）嘅鞋，姑仔就叫佢買啦，你有的是錢。但朱太好有咁話：「又唔係我啲錢。」你話天下間嘅女人都係咁就好。
但今次朱仔似乎都係視察吓民情，進修吓普通話。講起朱仔嘅普通話就真係不得了，佢先後兩次到訪清華大學以普通話演講，雖然佢啲普通話就真係普通啲，但咁有毅力，又咁有誠意，都為佢嘅親中形象加咗唔少分。
進擊的小朱
15年10月習近平夫婦訪美晚宴上，朱氏夫婦都在場，朱太就亦都確認咗腹中塊肉係BB女，咁不如搵習大大賀一賀佢啦？
朱仔：「我姓朱，老婆就生得，改咩名好？」（設計對白，真實意圖）
習大大可能心諗，我第一次見你，就要我幫你個女改名，下次見你會唔會話想嫁埋個女入我屋企㗎⋯⋯所以就好委婉咁話，責任太重大啦，都係親生老豆改好啲嘅。
唔緊要，朱仔再接再厲，馬上上Facebook打個靚卡：「今次係我首次同一個國家級領導人對話時，完全使用外語。對我嚟講係一個好有意義嘅里程碑。好有榮幸同習大大及其他領導人會面。」呢段說話勾起咗飛雲嘅小學回憶，好似去完參觀科學館之後寫果段後感呀。
除咗呢次著名朱習會面之外，朱仔16年3月仲親自飛去北京，同中共中央政治局常委劉雲山會面，表示Facebook「願更好了解中國、介紹中國，與中國同行一道，通過互聯網創造更加美好的世界」。
至於曾任中共中央宣傳部部長嘅劉同志都費事啋佢，直接背返習大大關於互聯網治理嘅「四項原則」同「五點主張」，並稱中國的互聯網在20多年的發展後，「走出了一條具有中國特色的發展治理之路」。（飛雲以為自己轉咗去做人民日報）
朱同志同劉同志會面之後，表示「高度評價」中國互聯網發展，更加表希望同政府合作，共創美好網絡世界咁話。
3個月散貨場式許可
2015年年尾小朱終於孝感動天（簡稱朱孝天，哈哈），成功令中國政府出咗張為期3個月嘅許可證比Facebook喺北京開Office。3個月，你估散貨場咩，都唔知係算唔算得上係綠燈。Facebook表示曾經考慮過3個月都搏一搏，話唔定單車可以變摩托，但最後都係不了了之。
尤其而家中國市場已經由微信、QQ、微博等瓜分天下，Facebook要分一杯羹唔單止要Follow the Great rules，仲要以卵擊石，Google前任中國主管李開復都指，Facebook要喺中國翻身機會緲茫。但朱仔對中國嘅堅持係非比尋常，堅稱中國市場對Facebook未來發展非常重要：「你唔可以以連接全世界嘅人為己任之餘，漏咗最多人嘅國家。」跨越呢個防火長城，似乎事在必行。
Google：我唔玩啦！！！你哋玩哂佢啦！！！（GIPHY）
防火牆係用黎防火嘛，你個facebook咪就係火囉
有人話，中國就係外國IT企業嘅擂台。付出嘅唔止係成本、創新，仲有「西方核心價值」之一－－言論自由。國際網絡巨頭Google、Yahoo（RIP）、微軟，無一不屈服過，Yahoo向中國政府交出革命人士個人資料而令被捕入獄，Google過濾過政府敏感嘅搜尋結果，微軟刪除記者博客。當中企得最硬嘅可謂係Google，2010年高調撒出中國，公開發炮指中國網絡審查問題嚴重，而且網絡安全有問題。
其實Facebook都唔係想像中死牛一邊頸嘅，例如巴基斯坦，俄羅斯同土耳其版嘅Facebook都有同當地政府合作，整咗個過濾版嘅Facebook出嚟，逢係某啲敏感議題一見就Block，就喺2015年7月到12月期間，Facebook就Block咗20個國家嘅5.5萬個內容，但而家中國要求嘅係未出發先興奮，敏感內容要出現之前就扼殺佢！
有Facebook匿名員工表示，Facebook有考慮外判審查過程比第三方軟體件，明白嘅，富有中國特色嘅審查標準最好都係交返比中國人嚟做，你說對不對？Facebook嘅合作伙伴將會係一間中國公司，直接監察熱門Status，呢間中國公司將會全權掌管監控權，可以定有咩post可以出現喺你個wall，有咩post需要「被河蟹」。咦？咁不如同微博炒埋一碟，叫微書算啦。
呢個方法都係盛傳嘅其中一個打入中國市場嘅節衷方法姐，你估朱仔唔驚「西方價值」毀於一旦呀？其實而家Facebook都有賺緊人仔，就係透過香港Office幫中國公司賣廣告，但無可否認嘅係，Facebook若要真正打開呢個6億網絡使用者嘅金礦，難以避免要做一啲取捨。
朱仔嘅「中國夢」受到多方打壓，但佢依然努力去追，到底最後朱仔做唔做到朱總呢？放長雙眼睇下佢翻唔翻得過呢條萬里長城長又長啦。