【每逢大事講故事】沒有阿勒頗　賽馬同推理小說可能冇咁刺激……

雲集全球精英的國際大都會，各國商人趨之若鶩的商業、貨物轉運中心，繁榮、富庶、先進，東西文化交流要道，華麗建築物林立……以為是香港旅發局或向強國客推銷的樓盤廣告？Sor，呢幾句內容講嘅唔係香港，而是近排大家成日在新聞聽到的阿勒頗。
你無睇錯，係阿勒頗。

飛雲相信大部分港人一樣，平日工作繁忙，但都會留意下世界大事，花幾秒䁽下國際新聞……嘅標題咁囉，志在同客仔或老友吹水多個話題咁啫，敘利亞？中東成日打仗㗎啦，隔咁遠，都唔會打到嚟呢邊，關我咩事先？

當我喺FB見到Omran Daqneesh，即係果個成面灰成面血果個敘利亞男孩，係好慘，都好同情，但戰爭嘅嘢我控制唔到㗎大佬，我唔係無國界醫生，又唔係劉大尉，更加無超能力，想捐錢又唔知捐咗去邊度，真係愛莫能助囉係咪先。

我不是劉大尉

衰就衰在唔止飛雲一介平民係咁諗，連各國領袖都撓埋雙手闊佬懶理。馬照跑，舞照跳，女照溝，yeah！西方國家自掃門前雪，醒目仔普京心諗：「機會嚟喇飛雲！」把握時機出兵，將敘利亞攬上身，到全世界發現嘅時候，已經太遲。

一個人的聖誕

本來就算係咁，都唔關我事（係，我認我冷血），聖誕聚會特多，直到畀個關心世界大事嘅靚女兜口兜面問我：「咁你點睇阿勒頗？果度啲人點算啊？」，向來口若懸河的飛雲，只能苦笑以對，然後眼白白看着大好機會流逝，從靚女失望的眼神，哎，今個聖誕只好食自己了。

為免犯下重覆錯誤，唯有將勤補拙，研究下呢個鬼地方。點知一睇之下，不得了，阿勒頗橫睇掂睇都好似香港，其實唔係，因為呢個地方，比起香港歷史更悠久、更繁榮，直至2011年爆發內戰前，佢地同我地無咩分別，得閒放假行下商場或者去郊遊……

絲路重鎮　堅‧國際大都會

介紹返，早在5000年前已經有人聚居嘅阿勒頗（Aleppo），係現存世上最歷史悠久城市之一，仲勁過倫敦同巴黎。由於位處地中海與幼發拉底河（River Euphrates）之間，地理位置優越，公元前1800年成為雅姆哈德（Yamhad）王朝首都，之後不同王朝更迭，無論羅馬、拜占廷還是鄂圖曼等帝國治下，阿勒頗都是繁盛大都會，亦是絲綢之路西端重鎮。

在這裏，擁有全球第一批領事館和貿易辦公室，威尼斯、英國、荷蘭、法國、印度商人擠滿街，買賣絲綢、香料和馬匹。講起馬，不得不提14戰全勝退役的一代歐洲馬王范高爾（Frankel）。

沒有阿勒頗　英國賽馬沒有今天

這匹被譽為「馬界保特」嘅英國純種馬，祖先正是英國商人戴利（Thomas Darley）在1704年由阿勒頗購入的一匹阿拉伯種馬Darley Arabian，經配種後改良為速度高、靈巧而鬥志旺盛的純種馬（Thoroughbred），至今經歷25代。這還不止，科學家研究後發現，英國95%雄性純種馬都是Darley Arabian後裔。

單在英國，賽馬、育馬每年相關直接收益有成300幾億港紙，老土講句，英國以至全球賽馬事業有今日，全靠阿勒頗咋。鍾意玩血統嘅馬迷，不妨留意下，香港有邊隻馬也可能是Darley的後世子孫。

Agatha Christie靈感地

唔好意思，講馬講得興奮得滯唔覺意扯遠咗添，總言之，可以想像得到阿勒頗想當年的繁盛境況，連莎翁名劇馬克白（Macbeth）同奧賽羅（Othello）都特別提到阿勒頗，著名偵探小說作家Agatha Christie也特別到此地找靈感，在Baron Hotel 203號房埋頭寫《東方快車謀殺案》（Murder on the Orient Express），幾許文人墨客、風流雅士濟濟一堂，真係人傑地靈呀，曾經。敘利亞在二次大戰後獨立，阿勒頗變身為工業城市，雖及不上昔日風光，但在政府大力發展當地經濟和古蹟旅遊下，無穿無爛算係咁，人口230萬，全國最高。

中東政局複雜到一個點，簡單咗好多嚟講，主要係遜尼同什葉兩大伊斯蘭教派之爭。遜尼佔全球近九成穆斯林，即係約15億人，什葉佔餘下一成，也有1.5億人，唔同國家兩者比例會有好大分別。敘利亞嘅問題係，由人口佔少數嘅什葉派，管治佔多數的遜尼派，不滿同反對聲音自然好似花貓咁「老是常出現」。

逃避不了的戰火

2000年前由艾薩德掌權年代，以恐怖手段管治，1982年曾以血腥大屠殺鎮壓反對派，仲自吹自擂屍體多到放火燒幾日都燒唔完。佢死咗之後，細仔巴沙爾上台。呢位在英國受教育嘅眼科醫生，斯斯文文，講嘢陰聲細氣，當時大家都幾期待敘利亞會變天。巴沙爾注重經濟發展，敘利亞總算過咗十零年平穩日子，點知2011年一遇上反對派抗爭，官仔骨骨嘅佢立即變臉，地堡炸彈、生化武器樣樣出齊，連阿勒頗也遭殃。當然，ISIS等恐怖組織滲入反對派武裝分子之中，致命殺人武器來自哪邊真係天知地知我唔知，但夾在中間被當成靶咁射嘅平民真係無辜辜拮屁股。

♫ ♩ 「都是你的錯　瀟灑也是錯」♪​♬

呢單嘢搞到失控，有一個人最大責任。諾貝爾「和平」獎得主奧巴馬當時大大聲話要推翻巴沙爾，點知講來講去得把口，遲遲唔出兵，之後改口話打擊ISIS算數，阿勒頗班平民真係多得你唔少（以美國利益出發，唔出兵其實都無錯，那是後話）。見美國忍手，阿富汗戰爭後失去中東話語權嘅俄羅斯，2013年把握機會出兵撐巴沙爾，阿勒頗今日慘況同俄國空襲同武器有直接關係，不過邊有人夠膽同普京講叫佢撤先？

不過講來講去，其實最想講嘅係，阿勒頗，曾經同香港一樣繁榮安定，一場無情的戰爭改變一切。香港依家好似風平浪靜，但你永遠唔知下一刻會發生咩事。所以，世界大事真係要知多啲，知得深入啲，得閒幻想下有咩方法拯救阿勒頗，你真係唔知幾時會遇到個在聯合國難民組織工作嘅靚仔靚女㗎嘛哎。