【每逢大事講故事】文在寅同金仔侵侵攻四方城 鬆章鬆出個未來
人品好，牌品自然好，可見麻雀枱上真係可以悟出人際關係大道理。韓國總統文在寅今次同朝鮮領導人金正恩金仔嘅世紀峰會，如果同文在寅打牌，應該會幾開心。
文在寅本身手牌真係差。首先，前朝政府同金仔關係見冰點，鬼咩？兩代保守派總統，李明博當2000年簽定嘅「南北共同宣言」係死嘅，朴槿惠仲想搵人去刺殺金仔，金仔理得你之前點「陽光政策」呀，梗係攪到你暴風雪，唔係點同死鬼爺爺同死鬼老豆交代！
加上東亞局勢一直係個個都想插隻手嘅議題。朝鮮半島問題，明明就係南北兩個政權嘅問題，唔知幾時開始好似「保護環境」咁，變成「人人有責」，全因為「朝鮮半島問題」中間多咗個字……唔係晌中間加個「助語詞」呀，係個「核」字呀。
呢個「核」字，除咗代表「核武」，更反映呢個係半島上嘅「核心」問題。好多人話朝鮮核問題始於上世紀90年代、朝鮮當時嘅領導人金正日發展核武，引發一連串國安同外交問題，但其實「核心」問題可以講到更早年代……
喺盤古初開嘅年代……你以為飛雲講笑？唔係呀，認真㗎。據講用嚟做核武嘅主要成份「鈾」係史前已經存在；而朝鮮除咗人參多，另外就係多鈾，因此朝鮮本身就有發展核武嘅優勢。
呢個優勢去到上世紀50年代朝鮮半島分裂成南北兩個政權後，起咗關鍵作用。朝鮮同前蘇聯合作研究核能，鋪路發展核武。到90年代，朝鮮主動提出朝鮮半島無核化，今時今日睇返簡直好似科幻小說咁離奇。金正日話無核化？但係又係認真㗎，因為當時韓國都準備發展核武，加上美國喺韓國亦有部署，所以金正日就想嚟個先發制人。
當然，今日睇返轉頭，金正日有冇講無核化都冇所謂喇，因為佢個囝囝金正恩已經威到，聲稱研發核武成功。但係金仔明白，「放手，放開所有，彼此更自由~ 」所以又話唔玩核武，讓朝鮮半島免除核戰危機，真係多核謝晒呀！
有呢個歷史背景，都明白文在寅夾喺朝鮮同國際中間，真係「難為了家嫂」。
不過正如香港民間特首劉華話齋：「愈爛嘅牌就愈要俾心機打。」文在寅打呢舖牌真係好俾心機。
金仔放棄核武，唔係懦夫，一方面係佢反正都已經證明咗自己嘅能力，唔怕你哋班友唔聽佢支笛。另方面係，65歲嘅韓國總統文在寅對住後生佢近半、34歲嘅金仔，夠晒忍辱負重。佢又哀又篩，先終於求得今日嘅兩韓峰會。朝鮮同韓國嘅文化都係好傳統嘅，所謂長幼有序，文在寅對金仔都咁忍讓，難怪啲人都讚佢百忍成「金」。
文在寅真係堅忍過「大長今」！
文在寅上任總統唔夠一年，朝鮮半島局勢就嚟咗個180度轉變。你可以話佢好彩，撞啱金仔心情好讓步；可以話係韓國好彩，因為保守派嘅朴槿惠「適時」爆出醜聞，造就親朝的文在寅上場；亦可以話係文在寅有手段，氹掂金仔又拖得住特朗普。不過飛雲係相信堅持就會成功嘅正面樂觀好青年，就認為文在寅係勝在……
▲「我的字典裏沒有~ 放棄~ 因~ 為已~ 鎖定你~」
文在寅因為家庭背景（佢嘅父母來自朝鮮咸鏡）同政治背景（同佢亦師亦友嘅盧武鉉積極推行對朝「陽光政策」），對朝鮮特別有情意結，舊年佢上場後，唔似前總統李明博同朴槿惠咁，對朝鮮問題視而不見、甚至採取強硬態度，反而立刻就對金仔伸出橄欖枝。
對於文在寅嘅熱情，金仔最初「其實是拒絕的」。好似2017年下半年基本上文在寅都不斷邀請朝鮮派隊參加平昌冬奧、或者兩韓組隊參賽、或者兩韓代表高舉統一旗入場等等……總之就好似唐僧咁，成日喺度依……哦……
▲Only you~ Can 令半島和平~
坦白講，唔止朝鮮半島，甚至地球嘅命運，都靠晒金仔㗎。但金仔始絡係堂堂國家元首，「你不能叫我拍、就馬上拍」，容乜易你之後「加了很多特技」，搞到我形象「動L」？
所以當時佢雖然冇答應，但亦冇直接拒絕，只係不時攞支導彈出嚟射下，試下文在寅嘅虛實。呢種態度維持咗約半年，2018年新年新開始，金仔終於踏出第一步。
金仔「打開口牌」，話有意參加平昌冬奧，一直就等緊金仔開口嘅文在寅，梗係即刻鬆章啦，要筒子、俾筒子，要索子、俾索子。朝鮮話只談平昌冬奧安排，韓國就唔講核危機；朝鮮先遣考察團訪韓計劃又話取消又要改期，就算冇解釋韓國都收貨；甚至為咗朝鮮有面子，韓國犧牲半隊女子冰曲嚟同朝鮮組聯隊，美韓軍演都叫停。鬆章鬆到出晒面，文在寅夠誠意喇卦。
即刻睇下文在寅點鬆章俾金仔：
韓朝合組女子冰曲聯隊戰冬奧 球員為和平犧牲 背後辛酸有誰憐？
【視角】停戰64年韓國與朝鮮對話無門 金正恩不放文在寅在眼內？
之但係咁，文在寅高章之處，係佢唔止鬆章俾金仔，仲鬆埋俾對家美國總統特朗普侵侵。基本上呢舖牌，金仔要贏，侵侵唔想輸，文在寅如果只顧同金仔打龍通，侵侵仲肯玩落去咩？所以文在寅亦適時出沖俾侵侵食一、兩舖，例如雖然侵侵對金仔充滿敵意，又話金仔係「火箭人」，又要同人battle個核武按鈕，但文在寅竟然都讚侵侵促成韓朝對話功不可沒，嘩，真係死都俾你拗番生，高手！
文在寅咁委曲求存，左右逢迎，真係「難為了家嫂」囉。如果美國前總統奧巴馬上任未夠一年可以有諾貝爾和平獎，文在寅促成兩韓對話、甚至美朝對話，更甚者可能真係會停戰，核危機真係化解咗，咁佢都值得攞獎喇卦？
又如果朝鮮半島真係停戰，嚴格嚟講侵侵同金仔都可以一齊攞獎，因為真係有資格講停戰其實係佢兩個。咁邊個最慘慘豬？咦？一枱麻雀要四隻腳，文在寅、金仔加埋侵侵都係三個人，數漏邊個？咪就係冇人鬆章俾佢、冇人睇佢面色嘅日本首相安倍晉三囉。