【特首選戰】曾俊華出席中大講座金句逐句捉

盛傳決定去馬選特首的財政司司長曾俊華，今日出席中大公開講座時，以《我的公僕生涯》分享自己的成長及從政經歷及與學生交流，其間妙語連珠，對於何時辭職參選特首，形容是「天機」; 又隔空回應指他「hea做十年」的新民黨立法會議員葉劉淑儀，「如果真係可以hea到十年，都幾有天才」，引來全場笑聲滿溢。

在美國生活

曾俊華小學就讀傳統名校喇沙小學，其後升上喇沙書院讀初中不久後，一家六口移民美國於曼哈頓定居。他在麻省理工學院（MIT）建築學系畢業，做過建築公司、開過裝修公司，開辦小區內首間華人診所，其後在波士頓州立學院修畢雙語教育碩士學位，在當地公立學校教書，雖然過著「非常之中產嘅生活」，但與太太決定一家四口回流香港。

（決定回港）外母鬧到爆，話我開始有舒適生活，咁安定，仲走去邊呢？......當時中產生活確實帶咗我入去comfort zone（舒適區），令到我個惰性非常之大，環顧係好多朋友都係咁樣入咗個陷阱後，突然發覺過咗幾十年，都係過緊同一樣嘅生活。咁我對呢方面有少少恐懼，最擔心自己跌入呢類問題，開始諗一諗有冇改變。

點評港產片《點五步》

曾俊華加入政府後首份工作任職沙田民政事務助理專員。任內與時任沙田民政事務專員、前特首曾蔭權，促成成立棒球隊「沙燕隊」，即港產片《點五步》的故事背景，笑言此片有一缺點。

其實呢齣戲唔錯，最大缺點係無一個靚仔演員，飾演當時嘅ADO（沙田民政事務助理專員，即曾俊華自己）。

自評工作成效

曾俊華1997年調任香港駐倫敦經濟貿易辦事處處長，後被首任特首調回港,，以政務官身分空降海關出任關長，打擊當時猖獗的盜版問題。

我被派去倫敦經貿辦事處做倫敦代表，然後一年零、兩年左右，董生就過嚟要求我做海關關長，組織專責隊伍打擊翻版。我諗在座有好多同學連翻版碟都未見過，咁即代表我幾成功！

分享為官體驗

講座上總結在官場30年的體驗，得出有五點：重溝通、從不同角度思考、政治需要妥協、要有原則及有團隊精神。

政府嘅嘢涉及唔同範疇，一個人係冇可能做得晒所有嘅嘢，我不時同我同事講，其實同事唔多，主要係三個人。計算一下就算我一個人比一個同事係叻，都冇可能叻過晒三個人總和，所以要問佢哋意見、聽佢哋意見、跟隨佢哋意見。

 回應葉劉淑儀「hea做論」

表明也將參選特首的行政會議成員、新民黨主席葉劉淑儀日前批評「過去十年hea做」，曾俊華妙語反駁指控。

當我做海關關長時，阿葉太係我老闆（保安局局長）佢當時都畀幾好嘅評價畀我。咁多年不時畀意見我，我都好多謝佢，好多時呢啲意見都可啟發到啲盲點。葉太喺政府工作咁多年，都知道司長呢份工係重要，如果真係可以hea到十年，都幾有天才。

回應參選特首意圖

有中大學生引述《香港01》報道曾俊華已去信中央稟報將辭職參選特首，要他證實與否，以及何時會有公布。

我都答過呢個問題好多次，我都講過，如果我對香港有貢獻，我係絕對會考慮任何事情，現在都係一樣，所以我諗…即呢…我都唔講太多啦，哈哈哈。......（何時有宣布？）呢個係天機。