【情人節】相戀七載女友願捱劏房 「毒男」陳澤滔嘆對她有所虧欠
常被外界認為是「毒男」的陳澤滔，卻有一個低調的女友。身任東九龍社區關注組召集人，現時在迪士尼工作，他拿首期去選區議會、立法會，選了一次又一次，現時與女友齊住劏房。陳澤滔慨嘆「如果唔係選舉，會租到個好啲嘅地方住」。
求學時期的陳澤滔，切切實實是個毒男。中學讀男校，即使對面街是女校藍田聖保祿中學，他也沒有在街頭溜躂認識女生。
「真係無？」記者驚訝，「無呀，Christmas ball（聖誕舞會）嗰啲完全無去過」。陳澤滔形容當年認識的朋友都較為純情，大家都認為無特別需要認識異性，反而特別需要打機。「今晚返去又打喇，都係嗰班中學同學」，他稱，「打Winning囉！」中學只有打機、踢波、讀書和打橋牌，「我係橋牌學會會長，嘻」。
那麼總有同學能結識女校生拍拖吧？「都有friend成功溝到女㗎，我哋反而會恥笑佢」。
由男校到中大入讀男女比例嚴重傾斜的計算機工程，繼續毒男生涯。遇上自己不太喜歡的課堂，他會選擇走堂，「咁咪返房打機囉，瞓醒就打，肚餓煮個麵返嚟，又打。」大學生亦愛舉辦舞會，「都無join啲咩ball，自己都唔鍾意，又唔係成日跳舞啲人」。身為毒男，他打趣道，「怕醜，見到靚女都唔會走埋去結識佢」。
表白三戰兩成功
雖說是毒男，追求異性經驗不少，但成功率也有近七成；三次表白，兩次成功。第一次，數個男女較為熟絡，「我鍾意其中一個女仔，點知佢又鍾意（群組內）其中一個男仔。」儼如電視劇橋段，「男仔女仔就係咁㗎啦！」初戀女友是大學同學，year 2開始拍拖，「都係大O（迎新營）識，可以試咪試下囉！」直至七年前，到澳洲working holiday時，認識現任女友。
與女友相識過程，陳澤滔形容「係個幾得意嘅經歷嚟」。那些年到澳洲參加working holiday，在網上討論區集合一堆在澳港人，「add MSN，大家喺悉尼，就約咗幾個出嚟」。其中一人，網名是由數個英文字組成，陳澤滔不懂發音，詢問稱呼為何，對方回應女姓名字，才赫然發現對方是女兒身。「咁咪膽粗粗照約囉！」
之後陳澤滔再約女網友踩單車、行山，「人在外國可能孤獨啲，想搵個伴一齊，所以容易啲（成功）」。那年元旦，他和女友在悉尼橋下看煙花，「咁就一齊咗」。可知道女友喜歡自己甚麼？「可能都係無奈㗎咋，比人氹咗落搭！」
他笑說，「佢（女友）有時都問我，假如唔係喺working holiday認識，而係喺香港嘅地鐵站撞到，會唔會有膽去認識我？」他又再毒男上身說「痴線㗎你都！三唔識七走埋嚟！」
與女友同住劏房
女友與自己走過working holiday、預演佔中、佔領、區議會、立法會選舉，到特首選委選舉，陳澤滔坦言關注政治，會犧牲女朋友，「住屋上一定最大，如果唔係選舉，會租到個好啲嘅地方住」。
讀計算機工程，現時在迪士尼任工程師。雖然此工程師不同彼工程師，但兩者都解決不到土地問題。女朋友是自僱人士，他倆現同居於劏房，安樂窩連房間也欠奉。「有時就係要面對現實，大家而家會諗點樣將啲錢運用得好啲，其實都係搵個地方瞓下覺、煮下嘢食、上下網」。陳澤滔對生活可說是無要求，女友亦有為生活改變，「佢要降低要求嚟就返我」。
曾經有報道說，陳澤滔把首期花在競選上，「其實係買唔到啫……我拎住40萬，知道會選，就唔會扔啲錢嚟買樓」，他亦透露女友間中和他開玩笑，「幾年前又話買樓」。區議會及立法會皆未能成功當選，他參選特首選委時，女友亦有微言，「佢有話過我㗎，又選乜鬼呀！」陳澤滔笑言「我成日都同佢講唔會再選㗎喇」。
拍拖七年 愛女友唔港女
面對肯和自己捱劏房的女友，除了將首期花在競選上外，自己有甚麼做得不足？陳澤滔自認無心裝載，「我本身唔係一個會記呢啲嘢嘅人」，大時大節的慶祝活動，就是買壽司和生蠔回家吃，「情人節我都未諗呀唉」，連女友也抗議他粗心大意，「女朋友話我新年都唔買啲嘢比佢拎返屋企，希望今年中秋記得買月餅啦！」
政治是妥協的藝術，愛情如是，生活也如是。拍拖七年，他與女友均「鍾意盧巧音、鍾意黃子華、鍾意講笑、鍾意窒下人，呢啲生活上嘅小細節就幾適合」。陳直言女友是理想對象類型，「非常之唔港女」，行文青路線，直言「女友有品味啲，對好嘅嘢要求高，我自己生存到就算，有嘢食，食得飽就得」。
訪問地點馬灣是他倆較常去的地方，因女友喜愛歐陸式風格，笑著說「好煩㗎佢！」雖說馬灣常去，但其實亦有兩三年無踏足。女友約他行山，他也拒絕，原因是懶，「好遠呀，要搭車」。
「懶」得不願出軌
陳澤滔這種懶，也是女友放心的一大來源。「一腳踏兩船好辛苦個喎，一個都已經要嘥咁多時間！」陳笑說。大慨女友也看穿他這種懶，他直言假若現時愛上一名超級美女，也未必敢放棄現任女友，「兩個人相處唔係睇兩個人有幾叻、有幾多身家，係真係頂唔頂得你順。你已經唔會再有信心，又要再同新嘅人磨合，唔覺得會有一個人更適合」。
那短期內會結婚嗎？他說兩個人均無生育打算，結婚誘因不大，「而家咁嘅生活都OK，簽個名個意義喺邊？」又擔心終有一日會因政治連累女友，「好似游蕙禎咁，隨時比人告到破產」。
話說到最尾，陳澤滔欠女朋友多嗎？「有……其實無得計」。他頓了一頓，「要喺個人生度搵到一個適合，又頂得順你嘅人唔係一件好易嘅事，本身自己係一個奇怪嘅人，有人頂得順你，都係一個幸運」。