乘客召的士機場去荃灣開價$100　加1備註激嬲司機：搭巴士啦乞衣

「八五折」的士已經是「小兒科」？有的士司機上載電召的士App截圖，指有乘客「call車」由赤鱲角機場到荃灣，卻開價「$100定食（100元車資全包）」，令他無奈表示「最新折扣45折」。除了「$100定食」，乘客更加上1項要求，網民、的士行家看後「寸爆」，「搭巴士啦，真係乞衣到無朋友」。

該的士司機於Facebook群組「的士司機資訊網Taxi」，感嘆「最新折扣45折」。

從樓主上載電召的士App截圖見到，有乘客「call車」由赤鱲角機場一號客運大樓到荃灣花園，全長23公里，並要求「只限豐田混電」，當時正「等緊行李」。

根據「HKTaxi」資訊，由赤鱲角機場一號客運大樓到荃灣花園，車程約25分鐘，正常車資為190元至230元，意味「$100定食」相等於五二折至四三折車資。

帖文引來網民、的士行家熱議，認為乘客要求太離譜，「搭巴士啦，真係乞衣到無朋友」、「吉車都唔益佢」、「2025年都無人接」、「士可殺不可辱」、「冚家X客」、「出荃灣起碼200」。