廚師腸跌落垃圾桶及地下　快餐店員工咁做後照煮　網民反應是…

大菌食細菌，細菌當補品？日前有食客光顧某大型連鎖咖喱店時，目睹有員工2次不慎將食材分別跌至垃圾桶以及地下，對方竟然重新拿起，然後用清水清洗後，就再拿去烹調供客人食用，其他同事亦沒有出言阻止，食客見狀發文指該店員工「毫無衛生意識」。雖有少部份網民認為員工行為噁心，不過大批留言反指樓主小事化大，更反問他「好多屋企阿媽煮飯嘅時候都會跌咗啲食材落地下，跟手執返起用水喉水沖吓再煮…閣下會唔會以後都唔再喺屋企食飯？」。

「大家睇路」該食客在facebook群組「飲食黑店大全 (全港食店質素/價錢/服務關注組)」發帖，指控某大型連鎖咖喱店的員工「毫無衛生意識」，並上載1張圖片，表示親眼目睹該員工打開廚師腸包裝時，不慎將廚師腸掉落至垃圾桶。對方及後「一條一條執返上嚟」，再放於洗手盤清洗。

不過大頭蝦的員工後來再次將廚師腸掉落地下，然後又再重新清洗，其他店員則沒有阻止，還對着樓主微笑。樓主無奈稱，眼見曾跌在垃圾桶和地下的腸仔被煎完放在其餐碟上，卻因為趕時間所以沒有和他們爭論，只能進食時默默拿走香腸作罷。

不過，大部份網民認為樓主公審多餘，「再煮熟你都驚？唔好出街食飯啦你」、「好多屋企阿媽煮飯嘅時候都會跌啲食材落地下，跟手執返起用水喉水沖吓再煮…閣下會唔會以後都唔再喺屋企食飯？」、「有洗已經係正常做法」、「你唔係趕時間無嘈，係你無膽」、「雪糕就話啫」、「樣樣跌落地下都話唔要，如果你做老細真係蝕到執笠」、「驚咪唔好叫廚師腸囉」、「擺埋落你碟飯你都要？點解你唔當場指正佢做法錯誤？」；並揶揄「佢咁就唔啱喇，應該落洗潔精洗」。

面對眾人抨擊，有少部份人支持樓主，「原來咁多港人食物衛生水平要求咁低，人真係不進則退」、「跌落地下都算 ，但跌落垃圾桶就真係誇張咗啲」、「食飯真係唔好睇住人煮，眼不見為淨，就算喺屋企都一樣」、「幅圖係證明唔到佢真係跌咗腸落垃圾桶，但如果係真都幾噁心」。

（FB（飲食黑店大全 (全港食店質素/價錢/服務關注組)））