打工仔表現好獲加薪　突遭上司以1離奇理由解僱　網民質疑有內情

表現好獲加人工後，突然被即時炒魷？有打工仔大呻自己在公司工作了2年，早前在績效被讚工作表現好而獲加薪，但日前突被上司以不適合公司發展方向為由炒魷，更稱不會提供推薦信。樓主透露上司曾私下提醒，「唔希望我同其他人social太多」，但他被發現用WhatsApp Web版和同事聊天後有天被叫入房，要求即日離開。樓主稱他剛剛做完手術急需要錢，現時相當迷惘，甚至有了負面想法。不少網民質疑事件另有內情，「睇嚟樓主唔知自己衰咩」，又認為如果懷疑涉及無理解僱，應該向勞工處求助。

樓主投稿至facebook專頁「奴工處」，大呻在前公司工作2年，最近突然被上司以「唔適合公司發展方向，加上工作表現差」為由解僱，但明明早前公司績效報告讚揚他工作表現好，獲加薪5%。

樓主自問工作表現無問題，和他合作過的同事亦同意，只是最近他多了和同事聊天，大家開始熟絡，「上司有私下同我講過，話唔希望我同其他人social太多，希望返工專注做返嘢就好」，所以他平日和同事聊天只會談公事，其餘都只會用WhatsApp Web版私下聊。

至近月上司偷看到他用社交程式和同事聊天，開始給他無理的工作，連其他同事跟開的工作，「冇啦啦鬧我點解做漏，重拎翻我3個月前嘅email出嚟話我打錯咗隻字等等」。早前上司突然叫他入房，批評他返工不專心，已不適合公司，要他即日離開，「連reference letter都唔畀我，仲話如果第時有reference check，會如實話我工作表現差」。

樓主透露最近才做完手術，現時急需用錢，突然被炒擔心難找工作，感迷惘又無助，出現情緒問題、頭暈頭痛要吃藥，甚至一度想不開，「好唔開心，都唔知點算」。

有網民提醒，如果從未收警告信，「仲有人工加，用表現差呢個藉口解僱嘅話，即係無理解僱，已經可以去勞工處開file」，如公司解釋到不符合發展方向，應該算裁員，否則解僱理由不充分，建議樓向勞工處求助，「做完手術即刻畀人炒？似有問題囉，平機會幫唔幫到你？」。

不過，部分人認為上司早已提醒，「某程度上工作環境真係唔應該講太多私事」，樓主本身要做手術不能失去工作，「你都仲要咁做，你唔係覺得自己好穩陣吓話」，而且現時上司做法太絕，懷疑另有內情，「feel到個故事唔完整」。有留言認為被炒可能涉及被投訴或「篤灰」，「可能打擾到部份同事工作都唔知」、「似講上司壞話被發現然後公報私仇」、「同你傾計個同事會唔會上司溝緊？」。

（facebook專頁「奴工處」）