驚險！公屋狂男不滿樓上噪音　單手抓杆危企23樓欄杆隔空對罵

如鄰里時常製造噪音，的確很是惱人！近日網上流傳一張照片，有公屋住戶疑似不滿樓上鄰居製造噪音，竟於23樓爬上欄杆，於天井處探身而出，與24樓住戶叫囂互罵。當時他只用單手抓住欄杆，踩着拖鞋，畫面非常驚險！有網民指男子此舉甚是危險，「佢着住拖鞋㗎喎大佬，夠力都冇用啦！跣腳就……」、「嘩…街坊有咩事落返嚟先講，好危險呀」。

該網民日前在facebook群組「青衣街坊吹水會」發帖，表示於大廈23樓見到有赤膊男子於天井欄杆旁與上層住戶對罵，指責對方製造噪音長期影響，結果竟然爬上欄杆，與對方對罵，「佢就咁爬上去對住嗰戶人開罵」。從照片可見，男子腳踏拖鞋，站在欄杆之上，大半個人伸出圍欄外，他左手垂在身側，僅靠右手抓住1根垂直的幼鐵杆，場面甚是危險。

樓主表示，「呢到23樓呀…見到都得人驚」，又指他見到後已通知樓下保安，而男子之後亦已爬下欄杆再上門與樓上鄰居互罵。他又透露，男子與樓上鄰居並非首次因噪音問題爭執，2周前的某夜凌晨1點至2點間，亦曾喝罵了半小時。

他續指，能理解「長期受躁音真係幾惡頂，」，不過人身安全更重要，「今日仲要星期日，但要鬧直接上一層去佢門口好過咁樣爬上去吖。一個唔小心真係咁大，見到都覺得危呀」。

事件引起網民熱議，有眼利網民就認出男子身後的天井設計，推斷事件發生於長青邨，「（青衣公屋）得長青係井字型」。不少人都認為長期受噪音滋擾的確容易令人情緒緊繃，但就認為應選擇安全方法，如報警或向房屋署投訴，「報警會唔會好啲」、「一陣間贏咗場交輸咗條命咁就無謂啦」、「樓上噪音係好難忍受的」、「噪音真係好難頂，易地而處，諗吓人哋， 唔好咁自私」。