【母親節】照顧言語遲緩子　好媽媽：依家至知阿媽真係超勁

「世上只有媽媽好」這句話從小聽得多，但當自己生兒育女、加入母親行列，更能領悟到箇中真締。
陸太兒子語言發展遲緩，相對一般家長，煩惱自然更多，但她一直笑着面對：「未生之前真係唔覺嘅，自己有咗小朋友之後真係......母親幾偉大！」

「我都覺得我呀媽好勁囉！」陸太三年前誕下兒子丞彥，但丞彥遲遲不開口說話。歲半時被診斷為語言發展遲緩，陸太引述治療師指，「佢（丞彥）其實有音、有口形，但唔肯講」。陸太憶述那段丞彥未懂說話的日子最難捱，「（丞彥）聽得明講咩但未識講嘢，成日喊、碌地，情緒好大起跌」。那段時間，陸太回家看見丞彥，不禁問自己一句：「想點呀？」

報讀幼稚園　多次食「閉門羹」

香港家長總想子女「贏在起跑線」，丞彥正正於起跑線大落後，陸太自然心急、煩惱。去年到幼稚園面試入讀N班時，２歲的丞彥仍未懂說話，走遍五、六間幼稚園，換來一次又一次「申請人數眾多，不獲取錄」結果，幸得扶康會願意取錄丞彥，讓丞彥在尋得N班學位之前，先行修讀短期課程。

「嗰時開始驚喇，我話死啦，連唔識講嘢都唔收，我可以點呀？」幸好上天在密封的屋子裏，開啟了一扇窗。家住長沙灣的丞彥，最終兜兜轉轉，獲葵盛一間幼稚園錄取，陸太才放下心頭大石。

最開心兒子懂叫爸媽

轉眼丞彥已三歲，先後入讀扶康會課程及幼稚園N班，由昔日不懂開聲，至現在牙牙學語，陸太期待已久一幕終於出現，「最開心咪就係識得嗌爸、嗌媽，識得叫，最開心囉！」回顧過去三年，陸太只慶幸兒子只有語言發展障礙，「如果佢真係有其中一範（如過度活躍症或自閉症等），就更加頭痛」，形容「知道無呢啲問題之後就放心哂！」

雖然言語發展遲緩，但在扭計、搗亂方面，丞彥表現非常突出。「屋企啲嘢擺高，佢夾硬要爬上去攞，最驚佢向後跌撼到個頭」、「食極都唔吸收」、「太心急就好忟，去街又想快啲返屋企」陸太形容，兒子不同歲數就有不同事情要擔心，估計丞彥升讀小學後情況會好轉，正如俗語說：「養兒一百歲，長憂九十九。」

談到升學，兒子過兩年便要再覓小學學位，陸感嘆：「我而家都驚㗎，我由始至終都無要求佢讀啲咩名校，或者有名氣嗰啲。」她希望丞彥未來成功入讀住處附近的小學，讓兒子上學不需再舟車勞頓。

成為人母　更知母親偉大

成為人母，才徹徹底底明暸母親當年的辛勞。陸太感慨：「有時突然間望住呀仔，先覺得，呀媽你真係好偉大！」回憶當年母親「一個湊住四個」，起居飲食一手包辦，「所以我都係覺得我呀媽嗰時真係……超勁！」

一年一度母親節又到，丞彥年紀尚幼，未能送上甚麼母親節禮物，陸太但願丞彥今年「唔好再咁無耐性，唔好再反叛」。至於自己，陸太眼神堅定，「早排我自己病咗，都覺得好辛苦……自己一定唔可以跌低！」望著在遊樂場遊玩的丞彥，無論未來是晴是雨，陸太亦繼續在照顧兒子的偉大航道上，與丞彥並肩前行。