【不懂撒嬌的女人】專訪唐詩詠：演技大躍進 全靠兩位大師
近日劇集《不同撒嬌的女人》成為城中熱話，最矚目的一對螢幕情侶要數Saving（王浩信飾）和Cherry（唐詩詠飾）。唐詩詠被網民熱捧演技進步，原來跟她演譯方法有關。博客游大東訪問了唐詩詠，她講述演技大躍進全靠兩個人。
《香港01》獲得作者授權，轉載唐詩詠的專訪。
唐詩詠在無綫首齣4K全實景劇集《不懂撒嬌的女人》飾演宣萱（凌敏）堂妹凌禹勤（Cherry），演技令人眼前一亮，看了頭幾集數場戲，經已察覺到在電視畫面出現的，是我從來沒在其他無綫劇集中見識過的唐詩詠，無論表情、眼神，甚至舉止，自然得來，惹人憐愛，加上她與王浩信這對情侶在戲中佔極重戲份，前者扮演Saving演得夠放，反過來帶動前者飾演Cherry時更加入戲，更加順眼，前所未見，仿如有高人為她打通任督二脈，釋放潛能，演技終於大躍進。真有此事嗎？Natalie對此直認不諱：「今次我嘗試用一個新嘅演繹方法！」聽罷更感好奇，誰人能夠令她開竅？由她親自向各位分享吧。
Q1：今次拍呢套劇，辛苦嗎？
答：好辛苦，時間比以往長很多，我哋亦都要習慣新的拍攝方式。而且今次我嘗試用一個新嘅演繹方法，不過大家可能未必會感覺到。
Q2：拍攝時間長好多，係因為要遷就實景？我都知道，如果係實景，每次轉換拍攝角度，鏡頭擺位、燈光都要郁過晒，而拍4K又要用新器材……
答：對吖，所以今次係一個新嘗試，咁如果出嚟反應唔好，以後就未必可以再用呢個新嘅拍攝方式。
Q3：你剛才講到，你今次用咗新嘅演繹方法，可以講吓係咩呢？我諗好多讀者都想知，咁樣對佢地了解你的演譯時會更加理解。
答：你覺得我今次有一個很大嘅進步，很大程度，我覺得係因為我嘅戲劇老師甄詠蓓，佢幫我釋放咗一啲嘢出嚟。係學習嘅過程中，佢亦都令到我明白自己內心一啲好美好嘅嘢，可能以前我覺得係一啲缺點，而佢會話畀我聽，係一啲好靚嘅嘢，同一時間亦都畀咗一啲信心我。
我其實唔係好識去講，點樣為之係一個新嘅演繹方法，好似講到好抽象咁。可能我跟咗老師上堂，喺果過程入面，我諗我自己係有一啲得着，佢令到我好多嘅觸覺都變得好敏銳，所以我今次拍攝《不懂撒嬌的女人》嘅時候係特別攰，係因為我好Sensitive，因為我好feel到每一個人喺度做緊啲乜嘢，我好容易會感受得到。
今次好多時候大家都會去設計一個角色，我不嬲都無去做呢一件事，可能係因為無任何戲劇嘅基礎啦，我都係一個一路做戲，一路去學，呢十幾年來，我一直都係咁樣，我又冇上過堂，咁所以變左每一套劇我都係上緊堂咁樣，之前自己又唔係好夠叻啦，如果用呢一個方法，可能好多時候未必可以好表達到嗰件事，宜家大個咗，經歷多咗，加上老師就幫我，所以就會有唔同。
我覺得係因為我嘅戲劇老師甄詠蓓，佢幫我釋放咗一啲嘢出嚟。
Q4：甄詠蓓點樣去令你「開竅」？有冇例子？ 你自己覺得同之前比較，你有咩唔同？
答：佢又未必係用「開竅」呢個字。
我跟佢學戲之前，我去咗佢嘅老師Philippe Gaulier度上堂（Philippe Gaulier是詹瑞文的師傅），上咗一個好短暫嘅課程，咁佢地都係堅持住一樣嘢就係，每一個人都係好Beautiful嘅，就係你要點樣去搵到你嘅Beautiful呢？我諗佢哋令我睇嘢嘅觀點有啲唔同，上堂嘅時候，佢哋透過好多唔同嘅練習，將我變番一個最簡單、最冇嘢諗，好似一個小朋友咁樣，我唔知你有冇聽過，啲人成日都話小朋友做戲其實係最叻嘅，因為佢哋好簡單，你畀啲咩野佢呢，佢地會即刻接收咗，會畀一個反應你。
我哋大人呢，就複雜好多喇，佢地中間嘅過程會諗太多嘢，然而已經忘記咗個初衷，咁我透過呢啲練習，好似搵番我自己咁樣，再一次去了解我自己，邊啲嘢令到我好開心，邊啲野會令我好憤怒，我聽見啲乜嘢會有啲乜嘢反應呢？
Q5：點解會開始跟甄詠蓓老師學演戲？
答：其實係因為那時候咁啱放假，然後就有個機會，可以去馬來西亞去跟Philippe Gaulier上堂，佢每年暑假，有四、五個月呢會離開法國，去其他地方上堂嘅，咁我果陣時就係去馬來西亞，係一個好短期，一個禮拜嘅課程，咁啱嗰陣時，Olivia（甄詠蓓洋名）就去咗探望呢位老師，那時候林嘉欣也在場，咁我就同佢地傾咗一啲偈，好簡單既對話，有一種好…嗯…佢好似睇到我一啲野咁樣囉，然後因為果堂課實在太深奧喇，所以令到我一直都有一個……覺得好似打唔開個結，因為我又冇辦法即刻去法國上堂啦，返到黎之後，就去了跟Olivia上堂。
我去咗佢嘅老師Philippe Gaulier度上堂（Philippe Gaulier是詹瑞文的師傅），上咗一個好短暫嘅課程，咁佢地都係堅持住一樣嘢就係，每一個人都係好Beautiful嘅，就係你要點樣去搵到你嘅Beautiful呢？
Q6：你仲會想飛去法國跟Philippe Gaulier上堂？
答：上次返到香港之後，我已經好想即刻跟佢去法國上堂，但係因為未有呢個機會，但呢個會係一個我好想完成嘅一件事，因為佢真係很厲害，有一雙能穿透別人內心嘅眼睛，對我嚟講，呢次係一個奇妙旅程。
Q7：雖然你覺得演《不懂撒嬌》好攰，但呢套劇算唔算係你從影十幾年來你自己暫時最滿意的作品呢？
答：都係我最滿意嘅作品，我滿意嘅係因為整個團隊囉，所有幕後嘅人，化妝、髮型、服裝、編劇、編審，Camera man、導演，所有人嘅心態，大家都係為住同一件事去努力，大家嘅嗰團火，係令我覺得拍呢套劇時候就算好攰，都仍然會好想去做嘅一件事。
【 基本資料 】
法國戲劇大師、表演大師Philippe Gaulier：1943年在巴黎出世，1967年於法國知名演藝學府L'École Internationale de Théâtre Jacques Lecoq畢業，1971至1980年間曾在母校執教鞭十年，1980年成立自己的國際戲劇學校，每年有來自世界各地的學生就讀。
Philippe Gaulier以嚴厲教學見稱，但也同時以獨特的幽默感，讓學生不斷在挫敗中，繼續帶著勇氣站在台上，積極嘗試，尋找自己的方式，找到創作表演的愉悅，顯現演員真正的美麗，找到表演的自由。其學生遍及世界，詹瑞文外，還包括香港電影金像影帝黃秋生、奧斯卡最佳女主角愛瑪湯遜（Emma Thompson），《魔街理髮師》女主角海倫娜寶咸卡特（Helena Bonham Carter）。
資料來源：verachc.blogspot.hk、蘋果日報
原文作者游大東為資深傳媒人，曾在電台、電視、雜誌和網媒等平台任記者和編輯，熱愛看電視節目，亦是Facebook專頁游大東【鴻鵠志－影視筆記】版主。