大義滅親！黃埔天地穿梭巴士被鎖　竟係由黃埔花園鎖車隊動手惹議

除了沙田第一城，黃埔花園鎖車隊同樣聞名全港。近日網上流傳1張照片，黃埔花園鎖車隊「發功」，竟然鐵面無私鎖黃埔天地穿梭巴士，照片惹起熱議，網民紛紛表示「大義滅親，大公無私」、「永冇偏私，自己人都殺」、「鎖車隊收工可能會冇巴士坐」、「唔交錢，最多大家冇穿梭巴士搭啫，怕咩呀」。

有港男於fb群組「馬路的事討論區」發文並貼出照片，可見到1輛循環來往黃埔天地及何文田的穿梭巴士停泊在德定街，前轆被鎖，旁邊放有兩個雪糕筒圍着。他笑言，「黃埔鎖車隊發功！鎖番黃埔穿梭巴士」。

黃埔自己人鎖自己人車引來一眾網民嘩然，留言笑說「攞石頭揼自己隻腳」、「玩到冇嘢好玩」、「鎖車鎖到入咗魔」、「支持鎖晒全部村巴」、「做到嘢喎，班居民會唔會衝落去問候一番？」、「我乜都唔知，我哋唔同部門嘅」、「下次會唔會輪到第一城鎖車隊鎖88R/61R」、「下次可能連買餸車都鎖呀」。